00:00 04 апреля 2012 г.
«Пирĕн пурнăç» хаçат 82 çул тултарать.
Çулĕпе ватăлать пулин те, сăн-пичĕпе илемленсе, район çыннисемшĕн илĕртÿллĕ, чи çывăх та юратнă хаçат пулса тăчĕ. Вăл пурин кăмăлне те тивĕçтерет. Унăн страницисенче çĕнĕлĕхсем чылай. Мана уйрăмах саламлă çырусенчи тав сăмахĕсемпе ырă суннă йĕркесем килĕшеççĕ, вĕсем çемьесенче туслă пурăнни, аслисене чунтан юратса хисеплени çинчен калаççĕ, çамрăксене ырă кăмăллă пулма вĕрентеççĕ. Хаçатра ятарлă «Çамрăксен страници», «Çемье страници», «Сывлăх», «Хÿтлĕх», «Арçын тата хĕрарăм», «Тăван тавралăх», «Шкул пурнăçĕ», «Çын тата Саккун» темăсемпе çырнă статьясем вулакансен кăмăлне каяççĕ.
Редакци ĕçченĕсем хаçата интереслĕ те илĕртÿллĕ тăвассишĕн ырми-канми тăрăшаççĕ. «Пирĕн пурнăç» тăтăшах 6 страницăллă тухма пуçларĕ, хаçат ятне тĕрлĕ тĕслĕ сăрăпа пичетлеççĕ, статьясене сăн ÿкерчĕксемпе пуянлатаççĕ. Республикăра тухса тăракан хаçатсем хушшинче пирĕн район хаçачĕ чи илемлисен йышĕнче тăрать. Кашни çемьерех ăна юратса вулаççĕ. Унăн тиражĕ халĕ 3412 экземпляра çитрĕ, пĕлтĕрхисенчен 272 экземпляр ытларах. Хаçат тусĕсен йышĕ çултан-çул ÿссе пырать. Вăл ял çыннисене ĕçре, пурнăçра, спортра çĕнĕ çитĕнÿсем туса район чысне çÿле çĕклеме чĕнет.
Апрелĕн 6-мĕшĕнче юратнă хаçатăн, ăна вулакансен уявĕ. Эпĕ «Пирĕн пурнăç» хаçатăн ветеранĕ, чи малтан вулакансен ячĕпе пултаруллă журналиста А.Н.Оринована тата вăл ертсе пынипе чунне парса ĕçлекен редакци коллективне пур кăмăлтан тав тăватăп, уяв ячĕпе саламласа район юбилейĕ çулĕнче çĕнĕ çитĕнÿсем тума иксĕлми вăй-хал, ăнăçу сунатăп.
И.Вазяков