00:00 28 мая 2012 г.
Иртнĕ эрне кун Вăрмарти потребительсен обществин никĕсĕ çинче массăллă информаци хатĕрĕсен представителĕсен семинар-канашлăвĕ иртнĕ. Ăна Чăвашпотребсоюз правленийĕ, Чăваш Республикин Культура министерстви тата республикăри Журналистсен Союзĕ йĕркеленĕ.
Республикăри потребительсен кооперацийĕ малалла аталанса пырать. Çакă Вăрмар райповĕн ĕçĕ-хĕлĕнче аван курăнать. Районта кăçалхи 4 уйăхри суту-илÿ калăпăшĕ 76900 пин тенкĕпе танлашать. Çав шутран 60 проценчĕ, е 57588 пин тенки районти потребительсен обществине тивет. Районта суту-илÿре тата обществăлла апатланура çĕнĕлĕхсем нумай. Семинар-канашлу кунĕнче район центрĕнче пиццери уçăлнă. Маларах "Органика" магазин районта тата республикăра туса кăларакан таварсемпе суту-илÿ тума пуçланă.
Лавккасене самообслуживани йĕркипе ĕçлесси çине куçарса пыраççĕ. Халĕ унта çак майпа 17 магазин ĕçлет. Çакă тавар туянакансене уйрăмах килĕшет. Нумай лавккасем тĕрлĕ таварпа суту-илÿ тунипе пĕрлех халăхран ял хуçалăх продукчĕсем – сĕт, аш-какай, улма-çырла, эмел курăкĕсем, юрăхсăра тухнă полиэтилен пленкисем тата ытти чĕр тавар туянаççĕ. Çăкăр завочĕ 100 тĕрлĕ продукци туса кăларать. Семинар-канашлăва хутшăннисем районти тĕрлĕ магазинсенче, çăкăр заводĕнче пулса курнă, çĕнĕлĕхсемпе паллашнă.
Аса илтеретпĕр, çакăн пек мероприяти пĕлтĕр пирĕн районта иртрĕ.
Хамăр корр.