09:28 05 июня 2013 г.
Шăмат кун, июнĕн 8-мĕшĕнче, районта ĕçпе юрă тата спорт уявĕ – Акатуй – иртĕ. Ăна йăлана кĕнĕ тăрăх "Чавал" уçланкăра ирттерме палăртаççĕ.
Çанталăк условийĕсене пула Акатуй икĕ çул хушши район центрĕнче иртрĕ, анчах та асатте-асаннесен йăли-йĕркине пăрахăçлас марччĕ, çĕр ĕç паттăрĕсене чыслакан уява темиçе теçетке çул "Чавал" уçланкăра ирттернине асра тытасчĕ. Çакна шута илсе тунти кун райадминистрацинче район ертÿçисем хутшăннипе ял тăрăхĕсен пуçлăхĕсемпе тата уява йĕркелеме туса хунă ятарлă комисси членĕсемпе канашлу иртрĕ, унта пухăннисем "Чавал" уçланкăна та çитсе килчĕç, ĕçпе юрă уявне июнĕн 8-мĕшĕнче асăннă уçланкăрах ирттерме йышăнчĕç. Пуçламăшĕ 11 сехетре.
Йĕркелÿ комитечĕ уяв программин сценарине хатĕрленĕ. Пĕлтерĕшлĕ ыйтусене – уçланкăна уяв умĕн тирпейлесе илемлетессине, хăтлăх кÿрессине, вăрмана пырса кĕмелли çулсем çинче юсав ĕçĕсем ирттерессине – çак кунсенче татса парĕç, хальхи вăхăтра ку енĕпе ĕçсем пыраççĕ. Çавăн пекех чылайăшне канăçсăрлантаракан саманта та – вăрманта тĕрлĕ хурт-кăпшанкă нумай пулнăран уява пухăннисене хăтлă пулмĕ тенине – тимлĕхсĕр хăварман: вăрăм тунасене тата сăвăссене пĕтерме уçланкăна ятарлă хутăшсем сапса тухма палăртаççĕ.
Енчен те çак кунсенче çанталăк тăрук çумăра кайсан, Акатуй уявĕ район центрĕнче иртĕ.
Хисеплĕ район çыннисем, ĕçпе юрă уявĕ хуть те ăçта иртсен те унта пурте савăнăçлă кăмăлпа пуçтарăнар, «акапа çĕр туйне» чыслăн ирттерер.
А.КАРПОВА.
Автономное учреждение Чувашской Республики «Редакция Красночетайской районной газеты «Пирĕн пурнăç» («Наша жизнь») Министерства информационной политики и массовых коммуникаций Чувашской Республики