13:44 17 июня 2013 г.
Июнĕн 14-мĕшĕнче Чăваш Республикин Информаци политикин тата массăллă коммуникацисен министерствин ертÿçи Валентина Андреева пирĕн района ĕçлĕ визитпа килсе кайрĕ.
Чи малтанах Валентина Владимировна тата район администрацийĕн пуçлăхĕ Александр Башкиров асăннă министерствăна пăхăнса тăракан «Хĕрлĕ Чутай районĕн «Пирĕн пурнăç» хаçат редакцийĕ» хăй тытăмлă учреждение çитсе курчĕç. Редакци ĕç-хĕлĕпе тĕплĕн паллашнă май кунти ĕçченсемпе тĕл пулса калаçрĕç. «Пирĕн пурнăç» хаçата тишкернĕ май Валентина Андреева министр пĕтĕмĕшле илсен районта тухса тăракан хаçатпа кăмăллине, унăн тиражĕ районта пурăнакансен шутне кура республикăра чи пысăккисенчен пĕри пулнине палăртрĕ. Райхаçатра кун çути куракан материалсем тулли, пуян содержаниллĕ пулнине каларĕ, çав хушăрах хăш-пĕр сăн ÿкерчĕксен пахалăхне ытларах тимлĕх уйăрмаллине асăрхаттарчĕ.
Редакци кивĕ çуртра вырнаçнă пулсан та шалти пÿлĕмсенче юсав ĕçĕсем ирттернĕрен кунта таса та тирпейлĕ, хăтлă пулни те, кăритурти стена çинче редакци тĕрлĕ çулсенче тивĕçнĕ дипломсемпе хисеп хучĕсем шăкăрин çакăнса тăни те министр кăмăлне кайрĕ.
Район хаçачĕн тĕп редакторĕ Галина Ястребова редакцин паянхи ĕç-хĕлĕпе паллаштарнă май 1930 çулхи апрелĕн 6-мĕшĕнчен кун çути курма пуçланă хаçат хальхи вăхăтра чăвашла, эрнере икĕ хут тухса тăнине, унăн тиражĕ 3600 экземпляр пулнине каларĕ. Хаçат район пурнăçне, кунта пурăнакансен, ĕçлекенсен кун-çулне çутатсах тăрать, вĕсене пăшăрхантаракан ыйтусене те тăтăшах тишкерет. Культура, сывлăх сыхлавĕ, вĕрентÿ, спорт темисене те, социаллă ыйтусене те райхаçатра ĕçлекенсем тимлĕхсĕр хăвармаççĕ.
Райадминистрацин пуçлăхĕпе Александр Башкировпа район ĕçĕ-хĕлĕ пирки сăмах пуçарнă май Валентина Андреева республикăри ĕç тăвакан тата вырăнти хăй тытăмлăх органĕсем патшалăх тата муниципалитет пулăшăвĕ панă чух ведомствăсем хушшинчи электронлă çыхăну тытăмĕнче мĕнле ĕçлени пирки сăмах пуçарчĕ. Валентина Владимировна каланă тăрăх, Хĕрлĕ Чутай районĕ ку тĕлĕшпе аван ĕçлесе пырать.
Редакцинчи тĕл пулăва вĕçленĕ май Александр Башкиров хĕрлĕчутайсен ячĕпе Валентина Андреевана асăнмалăх Иван Даниловăн «Красночетайский край» кĕнекине тата район гербне сăнлакан кăкăр çине çакмалли паллă парнелерĕ.
Юлашкинчен информаци политикин министрĕ «Хастар» физкультурăпа спорт комплексне çитсе курчĕ, унти лару-тăрупа кăмăллă юлчĕ.
Автономное учреждение Чувашской Республики «Редакция Красночетайской районной газеты «Пирĕн пурнăç» («Наша жизнь») Министерства информационной политики и массовых коммуникаций Чувашской Республики