08:32 13 января 2014 г.
Декабрĕн 27-мĕшĕ Шупашкара Олимп çулăмĕ çитнисĕр пуçне тата тепĕр пулăмпа асра юлнă. Çак кун республикăри тĕп почтамтра кунĕпех почта продукцийĕсене (марка, конверт, открытка) пичет пуснă.
Пĕрремĕш маркăна Раççей тава тивĕçлĕ спорт мастерĕ, XXVIII Олимп вăййисен хăвăрт утас енĕпе кĕмĕл призерĕ Олимпиада Иванова пичет пуснă. Савăнăçлă церемоние çавăн пекех республикăн физкультурăпа спорт министрĕ Сергей Мельников, Шупашкар хула администрацийĕн пуçлăхĕн çумĕ Максим Семенов хутшăннă.
"Раççей Почтин" республикăри филиалĕн пресс-служби пĕлтернĕ тăрăх, Олимпиада символĕллĕ почта продукцийĕсене пичет пусасси Олимп çулăмĕ çитекен пур вырăнта та, çĕр-шывĕпех, пулса пырать. Асăнмалăх штемпельсене ятарласа çак пулăм валли "Марка" Издатцентр Раççей Почтин пур филиалне валли те хатĕрленĕ. Кашни штемпелĕн хăйне евĕр ÿкерчĕк, вăл пĕр кун кăна вăйра тăрать.
Калас пулать, Шупашкарта Олимп çулăмĕ пулнине палăртса пичет пуснă конвертпа маркăсене район хаçачĕн редакцийĕ те асăнмалăх тивĕçрĕ, çакă редакци коллективĕшĕн почта ĕçченĕсенчен хăйне евĕр Çĕнĕ çул парни пулчĕ.
Н.ПЕТРОВА.
Автономное учреждение Чувашской Республики «Редакция Красночетайской районной газеты «Пирĕн пурнăç» («Наша жизнь») Министерства информационной политики и массовых коммуникаций Чувашской Республики