16:24 12 февраля 2015 г.
Фото А.Замуткиной.
Шăпах çавăн чухлĕ çул çитрĕ çак кунсенче "Коминтерн" хуçалăха Альбина Борисовна Новикова ертсе пыма пуçланăранпа. Çак хăйне евĕр юбилея халалланă мероприяти ĕнер районти Клубсен пĕрлештернĕ тытăмĕ-нче савăнăçлă лару-тăрура иртрĕ. Унта ЧР ял хуçалăх министрĕ Сергей Павлов, ЧР Патшалăх Канашĕн депутачĕсем Николай Маловпа Валерий Павлов, район пуçлăхĕ Александр Степанов, район администрацийĕн пуçлăхĕ Александр Башкиров тата тĕрлĕ çĕртен килсе çитнĕ паллă предприятисемпе организацисен ертỹçисем, АПК-ра тăрăшакансем хутшăнчĕç. Тухса калаçакансем пурте тенĕ пекех Альбина Новикова 20 çул хушши хуçалăха курăмлă аталантарса, малта пыракан технологисене ĕçе кĕртсе пынине, ĕç-хĕ-лри çĕнĕ çул-йĕрсене туптанине, хуçалăх республикăра малта пыракан хуçалăхсен шутне кĕме пултарнине палăртрĕç, унпа тачă çыхăнса ĕçлени пирки каларĕç.
РФ тава тивĕçлĕ ял хуçалăх ĕçченĕ Альбина Новикова вара: "Хуçалăхăн ылтăн фончĕ, малалла туртса пыракан тĕп вăйĕ яланах çын пулнă, пулать те", _ терĕ. Çавăнпах пултаруллă ертỹçĕ хăйĕн ĕçченĕсене хисеплесе хаклама тăрăшать. Паян "Коминтернра" 101 çын вăй хурать. Вĕсенчен 65-шĕ кунта 20 çул ытла ĕçлет, производствăра пысăк кăтартусем тăвать. 20 çулхи аталану историйĕнче хуçалăх тухăçлă ĕçленĕшĕн Диплома 9 хут тивĕçнĕ. Хуçалăхăн 10 ĕçченне "Чăваш Республикин тава тивĕçлĕ ял хуçалăх ĕçченĕ" ят парса чысланă. Ĕнер те ял хуçалăхĕнче палăрнисем, нумай çул тăрăшса ĕçлекенсем тĕрлĕ наградăсене _ "ЧР тава тивĕçлĕ ял хуçалăх ĕçченĕ" ята Елена Матвеева пăру пăхакан, "ЧР тава тивĕçлĕ механизаторĕ" ята Николай Лаврентьев тракторист, Чăваш Республикин Пуçлăхĕн Тав çырăвне Роза Данилова доярка, ЧР Патшалăх Канашĕн Тав çырăвне Галина Сергеева оператор, Светлана Афанасьева сысна пăхакан, ЧР Патшалăх Канашĕн Хисеп грамотине Александр Фондеркин тракторист, ЧР Ял хуçалăх министерствин Хисеп грамотине хуçалăх ертỹçин çумĕ Николай Воронов _ тивĕçрĕç. Уявра "Коминтерн" ЯХПК-н хисеп хучĕсене, сывлăха çирĕплетме каймалли путевкăсене тивĕçнисем те нумаййăн пулчĕç. Сăмах май, республика наградисене тивĕçнисене хуçалăх ĕç укçи çумне 20 процент, Раççей шайĕнчи наградăсене тивĕçнисене 40 процент хушса тỹлет. Альбина Борисовна саламсемпе парнесене йышăннипе пĕрлех ĕçе парăнса вăй хунăшăн, район халăхĕн ырлăхĕшĕн тăрăшнăшăн район пуçлăхĕн Тав çырăвне, çавăн пекех "Коминтерн" хуçалăх ячĕпе Сочине канма кайма путевкăна тивĕçрĕ. "Коминтерн" ЯХПК коллективĕ вара тỹрĕ кăмăлпа ĕçлесе республикăн тата районăн аталанăвне пысăк тỹпе хывнăшăн район администрацийĕн Тав çырăвне тивĕçрĕ.
Автономное учреждение Чувашской Республики «Редакция Красночетайской районной газеты «Пирĕн пурнăç» («Наша жизнь») Министерства информационной политики и массовых коммуникаций Чувашской Республики