08:25 18 февраля 2015 г.
Февралĕн 13-мĕшĕнче пирĕн районта ĕçлĕ визитпа Чăваш Республикин физкультурăпа спорт министрĕ Сергей Мельников пулчĕ. Вăл пире паян районта тата республикăра спорт мĕнле аталанни çинчен каласа пама кăмăл турĕ.
- Сергей Владимирович, пĕлтĕр пирĕн республикăра "Раççей - спорт çĕр-шывĕ" форум иртрĕ, унта хутшăннă сумлă хăнасем пирĕн тăрăхра физкультурăпа спорт мĕнле аталанни пирки ырă сăмах сахал мар каларĕç. Вĕсен сăмахĕсем чăнлăхпа килĕ-шсе тăраççĕ-и?
- Пирĕн республикăра чăнах та физкультурăпа спорта питĕ пысăк тимлĕх уйăраççĕ. Республика пуçлăхĕ хăй те спортпа туслă, эпĕ ертсе пыракан тытăм та унăн пулăшăвне туйсах тăрать. Юлашки çулсенче эпир спорт инфратытăмне çĕнетес тĕлĕшпе чылай ĕç туса ирттертĕмĕр. Пирĕн ĕçе çĕр-шыв тата тĕнче шайĕнче хаклаççĕ. Ахальтен мар пирĕн республикăра Раççей тата тĕнче шайĕнчи сумлă спорт ăмăртăвĕсем иртеççĕ. Кăçал, акă, çăмăл атлетика енĕпе Европăри команда чемпионачĕ иртет, 2016 тата 2018 çулсенче хăвăрт утассипе командăсен тĕнче чемпионачĕ пулĕ. Паян республикăра пурăнакансен 37 проценчĕ спортпа туслă. Вĕсен йышĕ ỹстĕр тесе кашни уйăхрах Сывлăхпа спорт кунĕ-сем иртеççĕ, ачасемпе çамрăксен спорчĕ аталанать. "Ĕçпе хỹтĕлеве хатĕр" комплекса тавăрни те халăхăн сывлăхне çирĕплетме тата пурнăç тăршшĕне вăрăмлатма пулăшать.
- Пирĕн районти спорт аталанăвĕн шайне мĕнле хаклатăр?
- Паллах, сирĕн районта та физкультурăпа спорта, сывă пурнăç йĕркине парăннисен шучĕ ỹссе пырать. Сирĕн спортсменсем шывра ишессипе, ирĕклĕ майпа кĕрешессипе, кире пуканне çĕклессипе ỹсĕм тăваççĕ. Çăмăл атлетсемпе полиатлонистсем те наградăсем илсех тăраççĕ. Çакăнта, паллах, 2012 çулта хута кайнă "Хастар" спорткомплекс тỹпи пысăк. Сăмах май, эпĕ унта пултăм, спорт комплексне çынсем хаваспах çỹренине курса ĕнентĕм.
- Çитес вăхăтра пирĕн районта çĕнĕ спорт сооруженийĕсем тума палăртатăр-и?
- Çитес вăхăтра районсенчи пур спорт комплексĕсем çумĕнче те çĕнĕ йышши стадионсем тума палăртатпăр. Çакна валли эпир федераллă тĕллевлĕ программăна кĕресшĕн. Ку енĕпе пире республика Пуçлăхĕ те пулăшнăран çирĕплетсех калама пултаратăп: çитес икĕ-виçĕ çулта Хĕрлĕ Чутай районĕнче синтетикăллă футбол уйĕллĕ тата чупмалли ятарлă çулсемлĕ стадион пулать.
- Каларăр ĕнтĕ, кăçал июньте Шупашкарта çăмăл атлетика енĕпе Европăри команда чемпионачĕ иртет. Республикăри ялсенче пурăнакансен "Олимпийский" стадиона çитсе çăмăл атлетсен ăмăртăвĕсене курма май пулĕ-и?
- Асăннă ăмăртусем июнĕн 20-21-мĕшĕсенче иртĕç, билетсене февраль вĕçĕнче сутма пуçлĕç. Билетсене чемпионатăн официаллă сайтĕнче тата хула кассисенче туянма май пулĕ, вĕсен хакĕ _ 200-800 тенкĕ. Палăртмалла, çак хаксем питĕ йỹнĕ шутланаççĕ. Ялсенче пурăнакансем, уйрăмах ачасен спорт шкулĕсене çỹрекенсемпе вĕсен тренерĕсем, Европа чемпионатне çитсе курччăр тесе эпир кашни муниципалитет валли 300-шер билет уйăрса хутăмăр. Унсăр пуçне эпир район ертỹçисем патне çакăн пек сĕнỹпе тухрăмăр: билетсене тĕрлĕ спорт ăмăртăвĕсен çĕнтерỹçисене парнелемелле. - Сергей Владимирович, тавтапуç калаçушăн.
Алина КАРПОВА калаçнă.
Автономное учреждение Чувашской Республики «Редакция Красночетайской районной газеты «Пирĕн пурнăç» («Наша жизнь») Министерства информационной политики и массовых коммуникаций Чувашской Республики