14:58 23 октября 2015 г.
Юпа уйăхĕн 22-мĕшĕнче Чăваш наци конгресĕн Хĕрлĕ Чутай уйрăмĕн хастарĕсем Юлия Мареева ертсе пынипе Шупашкарти конгресс çуртне усăллă тĕл пулăва килчĕç. ЧНК Президенчĕн пĕрремĕш çумĕ Валерий Клементьев хăнасене тараватлăн йышăнчĕ. Кунта Чутайри уйрăмăн чи хастар пайташĕсем çитнĕ. Вĕсен тĕп тĕллевĕ - конгресс ĕçĕ-хĕлĕпе паллашасси, усăллă канашсем илесси тата паллах, хăйсем туса ирттернĕ ĕç-хĕлпе паллаштарасси пулчĕ.
Чăн та, ЧНК Чутайри уйрăмĕ тăрăшуллă ĕçлет. Тăван чĕлхене, культурăна упраса хăварса ăна аталантарас тĕллевпе кунта тĕрлĕ меслетпе усă кураççĕ. Вĕсене ку ĕçре ентешĕсем, президиум пайташĕсем Петр Ивантаевпа Елена Османова пулăшма тăрăшаççĕ.
Акă халь кăна уйрăм хастарĕсем вăй хунипех Хĕрлĕ Чутай çыравçисен антологине кăларнă. Ку вăл питĕ лайăх пулăм. Ÿсекен ăрăва тăван чĕлхепе культурăна хисеплеме вĕрентессипе те уйрăм аван ĕçлени курăнать.
Тĕл пулу питĕ кăсăклă та усăллă иртрĕ. Валерий Клементьев Чутайсене ЧНК юлашки вăхăтра туса ирттернĕ ĕçсем çинчен тĕплĕн ăнлантарса пачĕ, çитес вăхăтра тата мĕн палăртнине уçăмлатрĕ.
Чăваш ялне аталантарас енĕпе еплерех ĕçлемеллине хăйĕн тăван ялĕн, Етĕрне районĕнчи Пупăлькассин тĕслĕхĕпе çирĕплетсе пачĕ.
Ку тĕл пулура ЧНК Етĕрне тата Муркаш уйрăмĕсен пуçлăхĕсем те пулчĕç. Çитес вăхăтра вĕсем те хăйсен хастарĕсене Шупашкара илсе килсе конгресăн ĕç опычĕпе паллаштарас шутлă.
ЧНК Хĕрлĕ Чутай уйрăмĕн хастарĕсене Валерий Клементьев чăваш наци музейне йыхравларĕ, кунти пуян экспонатсемпе паллашма май туса пачĕ. Каçхине вара хăнасем чăваш патшалăх академиллĕ юрăпа ташă ансамблĕн сезонне уçакан концертне васкарĕç.
ЧНК пресс-службин ертÿçи Зоя Яковлева.
Автономное учреждение Чувашской Республики «Редакция Красночетайской районной газеты «Пирĕн пурнăç» («Наша жизнь») Министерства информационной политики и массовых коммуникаций Чувашской Республики