08:36 14 сентября 2016 г.
- Ĕнер, сентябрĕн 13-мĕшĕнче, Шупашкарта Ял учителĕсен пĕтĕм Раççейри III съезчĕ иртрĕ. Константин Иванов ячĕпе хисепленекен Чăваш патшалăх академи драма театрне çĕршывăн 62 регионĕнчен килсе çитнĕ 500 ытла педагог пухăнчĕ. Пирĕн районтан съезда 13 çын хутшăнчĕ - вăтам шкул директорĕсем, методика пĕрлешĕвĕсен ертỹçисем.
Съезда пухăннисене РФ Патшалăх Думин вĕрентỹ Комитечĕн председателĕ Вячеслав Никонов, РФ Патшалăх Думин депутачĕ Алена Аршинова, Раççей Президенчĕн Атăлçи федераци округĕнчи полномочиллĕ представителĕн пулăшуçи Олег Машковцев, РФ вĕренỹ министрĕ Ольга Васильева, Чăваш Республикин Пуçлăхĕ Михаил Игнатьев тата ыттисем саламларĕç.
Ял учителĕсен съезчĕ икĕ пайпа иртрĕ. Пĕрремĕш пленарлă пайĕнче Ольга Васильева министр доклад туса пачĕ, çавăн пекех тĕрлĕ регион представителĕсем тухса калаçрĕç. Ун хыççăн 5 дискусси лапамĕ ĕçлерĕ, унта сăмах ял шкулĕсен малашлăхĕ, унăн аталанăвĕ, вĕрентекенсене социаллă пулăшу парасси пирки пычĕ. Пĕтĕм çĕршыври ял учителĕсем пĕрле пухăнса калаçни, пĕр-пĕрин опычĕпе паллашни пĕлтерĕшлĕ пулăм тесе шутлатăп. Хальхи вăхăтра пирĕн республикăра ялсенчи вĕренỹ тытăмне аталантарассине пысăк тимлĕх уйăраççĕ, съездра сỹтсе явнă хыççăн ялти шкулсенче тимлекен учительсен ĕç-хĕлĕнче ырă улшăнусем татах пуласса шанатпăр.
Автономное учреждение Чувашской Республики «Редакция Красночетайской районной газеты «Пирĕн пурнăç» («Наша жизнь») Министерства информационной политики и массовых коммуникаций Чувашской Республики