15:54 01 декабря 2016 г.
Алина Оринова, Хĕрлĕ Чутай районĕн "Пирĕн пурнăç" хаçатăн тĕп редакторĕ:
- Федераци Пухăвне янă Çырура Раççей Президенчĕ Владимир Владимирович Путин пысăк пĕлтерĕшлĕ, стратегилле пуçарусем турĕ. Вĕсем çĕршывăн çывăх вăхăтри тата малашлăхри задачисене палăртаççĕ.
Раççей Президенчĕн кăçалхи Çырăвĕ, ман шутпа, иртнĕ çулхисенчен уйрăлса тăчĕ. Çырура çĕршыв пуçлăхĕ ытларах халăхшăн калаçни палăрчĕ. Власть органĕсене халăхшăн ĕçлеме, халăхпа пĕрле пулма, вĕсемпе тỹррĕн, суймасăр калаçма ыйтрĕ. "Тĕрĕслĕх, уççăнлăх, ырăлăх" текен сăмахсем çине темиçе хутчен те пусăм турĕ Президент.
Çавăн пекех Владимир Владимирович Путин социаллă сферăра нумай улшăну пуласса та пĕлтерчĕ. "Çав улшăнусем халăхшăн пулмалла, çынсене пулăшу та паччăр..." - терĕ РФ Президенчĕ. Çырура медицина ыйтăвĕсене те чылай хускатрĕ. Медицина çултан-çул аталанса пырсан та татса памалли ыйтусем ку енĕпе сахал маррине те палăртрĕ. Врачсен хут çырса мар, пациентсемпе вăхăта ытларах ирттермелле, кашни больницăна Интернетпа çыхăнтармалла, черетсене пĕтермелле.
Шкулсем те малашне çĕнелĕç, вĕренỹ процесĕ те улшăнĕ. Регионсенче ачасен пултарулăхне аталантарма центрсем уçăлмаллине, çамрăк специалистсене çул памаллине те палăртрĕ РФ Президенчĕ.
Владимир Владимирович ялхуçалăх ĕçченĕсене уйрăммăн тав турĕ - хамăра хамăр тăрантарма çителĕклĕ продукци туса илтĕмĕр.
Пĕтĕмĕшле Çырури йĕркесем малашнехи пурнăçра халăхăн пурнăç условийĕн шайне татах та лайăхлатасси пирки пулчĕç. Апла пулсан пирĕн пĕрле пулса ыррине курмалла, шанма пĕлмелле.
Автономное учреждение Чувашской Республики «Редакция Красночетайской районной газеты «Пирĕн пурнăç» («Наша жизнь») Министерства информационной политики и массовых коммуникаций Чувашской Республики