08:28 06 марта 2017 г.
Чăваш наци конгресĕ йĕркеленипе "Чăваш тумĕ - халăх пуянлăхĕ" регионсем хушшинчи конкурсăн районсенче иртекен тапхăрĕ хĕрсе пырать.
Пуш уйăхĕн 2-мĕшĕнче Хĕрле Чутай культура керменĕнче иртнĕ уяв пурне те хăйĕн анлăшĕпе, пуянлăхĕпе савăнтарчĕ. Ку районти ЧНК уйрăмĕн ертÿçи Юлия Мареева ĕçе яланах тĕплĕ тăваканскер, ку хутĕнче те конгресс хастарĕсене хăйсен пултарулăхне, тăрăшуллăхне чăннипех кăтартса пачĕ. Ĕçе районти фольклор ушкăнĕсене явăçтарма пĕлни, халăха тăван культурăпа кăсăкланма хăнăхтарни куçкĕрет кунта.
Хĕрлĕ Чутай районĕнчи пур ялсенчен те тенĕ пек авалхи, асатте-асаннесен арчисенчи чăваш çи-пуçне тупса пуçтарма май килнĕ Чутайри ЧНК уйрăмĕн хастарĕсене. Хĕрарăмсемпе арçынсен авалхи пир кĕписем, сурпансем, хуçалăхра усă курнă савăт-сапапа ĕç хатĕрĕсем тата ытти япаласем фойери курава вырнаçнă. Енчен те Çĕрпÿре иртнĕ уявра ĕлĕкхи хушпусем нумай пулнă пулсан, кунта иртнĕ ĕмĕр пуçламăшĕнче ăсталанă масмаксем чылай пулчĕç.
Экспонатсене ялсенчен килнĕ фольклор ушкăнĕсем авалхи юрăсем юрласа пуянлатрĕç, куракансене тĕлĕнтерчĕç.
Чăваш наци конгресĕн хастарĕсем – жюри пайташĕсем, Чутайсем уява кăсăклă йĕркелессине туйса, кунта чылайăн килнĕ. Конгресс президенчĕн пĕрремĕш çумĕ Валерий Клементьев, халăх ăстисен ассоциацийĕн ертÿçи Зинаида Воронова, йĕркелÿ комитечĕн председателĕ Нина Андреева, культура комитечĕн пайташĕсем Елена Османова, Раиса Васильева тата ыттисем те куравпа кăсăкланса паллашрĕç. ЧНК Етĕрне тата Муркаш районĕсен уйрăмĕсен ертÿçисем Татьяна Яжейкинапа Наталья Николаева та кÿршĕсен уявне курса вĕренме çитнĕ.
Культура çурчĕн концерт залĕ витĕр сцена çине вăйă карти туса чăваш тумне тăхăннă фольклор ушкăнĕсем вĕçĕ-хĕррисĕр хăпарчĕç. Сцена çинче пĕр картана тăрса çаврăнса илемлĕ чăваш халăх юррине шăрантарчĕç вĕсем. Чăн та, питĕ илемлĕ, чуна тыткăнламалли ÿкерчĕк…
Ял тăрăхĕсенчен çитнĕ хастарсем хăйсем илсе килнĕ авалхи чăваш çи-пуçĕн историйĕ çинчен экран çинче кăтартса каласа пачĕç, кашни хутшăнаканăн сăмахне фольклор ушкăнĕсем халăх юррисемпе илемлетрĕç.
Аслисемпе пĕрлех чи пĕчĕк, çитĕнекен ăру та кая юлмарĕ. Акă Хĕрлĕ Чутайри «Хĕвел» тата «Пилеш» ача сачĕсене çÿрекенсем чăн чăвашла тăхăнса сцена çинчен юрă-ташă ăсталăхне кăтартрĕç.
ЧНК президенчĕн пĕрремĕш çумĕ, жюри председателĕ Валерий Клементьев тата жюри пайташĕ, çак конкурса пуçараканĕ Зинаида Воронова Хĕрлĕ Чутайсене уява пуян та кăсăклă йĕркеленĕшĕн чунтан тав турĕç. Жюри баллсене шутласан, пиллĕк номинациллĕ конкурсра çĕнтерсе Шупашкара, регионсем хушшинче иртекен ăмăртăва кайма Валентина Вязикова, Лариса Абакумова, Зоя Магаськина, Зоя Перепелкина тата Светлана Яруткина тивĕçрĕç.
Хĕрлĕ Чутайри ырă кăмăллă спонсорсем пулăшнипе конкурса йĕркелекенсем çĕнтерÿçĕсене дипломсем тата асăнмалăх парнесем пачĕç.
Пуш уйăхĕн 6-мĕшĕнче Канаш тата Етĕрне районĕсенче, пуш уйăхĕн 10-мĕшĕнче вара Муркашра çакнашкал уявсем иртмелле. Унта тата мĕн тĕлĕнмелли пулĕ-ши?
Сăнÿкерчĕксем
Зоя Яковлева, ЧНК пресс-службин ертÿçи
Автономное учреждение Чувашской Республики «Редакция Красночетайской районной газеты «Пирĕн пурнăç» («Наша жизнь») Министерства информационной политики и массовых коммуникаций Чувашской Республики