00:00 24 сентября 2008 г.
Сентябрĕн 15-мĕшĕнче Шупашкарта Чăваш наци музейĕнче республикăри музейсен пĕрремĕш фестивалĕ иртрĕ. Вăл «Музей – единство непохожих» ятпа пулнă. Унăн тĕллевĕ – республикăри аякри районсенче вырнаçнă музейсен ĕç-хĕлне халăх умне кăларасси тата унта ĕçлекенсене пĕр-пĕрин опычĕпе паллаштарасси.
Фестивале хутшăнакансем тĕрлĕ проектсем хатĕрленĕ. Жюри членĕсем вĕсен ĕçне тĕрлĕ номинацисенче хакланă. Фестивале районти «Çын тата çут çанталăк» музей та хăйĕн ĕçне тăратнă. Вĕсем «Хоровод дружбы» номинаципе Хĕрлĕ Чутай тăрăхĕн ĕлĕкхи çи-пуçĕпе хальхи туй тумтирне сăнлакан ĕçпе курава хутшăннă – Диплома тивĕçнĕ. Музей директорĕ З.С.Спиридонова номинацие тăратнă ĕçе хÿтĕлесе чăвашлăх туйăмлăхне çĕклекен юрăсемпе пухăннисене савăнтарнă.
Чăвашсен тĕрлĕ йăли-йĕркисене сăнласа кăтартакан фестивальре мĕн курмалли, мĕн вĕренмелли чылай пулнă. Музей ĕçченĕсем мероприятирен тулли кăмăлпа таврăннă.