00:00 25 марта 2009 г.
Хĕрлĕ Чутайри район сучĕн коллективĕ республикăри Юстици çуртĕнче иртнĕ йăлана кĕнĕ "2009 – çурхи фестивальте" хăйĕн пултарулăхĕпе палăрнă. Вăл "Наци йăли-йĕркине сарас" номинацире театрализациленĕ "Чăваш туйĕ" кăтартнипе чи лайăххисен шутне кĕнĕ. Сăмах май, ку фестивале 10 район сучĕн команди хутшăннă.
Район сучĕн коллективĕ чăннипех те пĕрремĕш вырăна тивĕç. Наци тумтирĕ тăхăннă юрă-ташă ăстисем вырăнти туй йăли-йĕркине кăтартнипе пĕрлех куракансене ташлама явăçтарнă, нумайăшне юр-варпа хăналанă.
Пĕтĕмĕшле илсен, суд ĕçченĕсем чăваш туйĕн йăли-йĕркисене анлăн кăтартма пултарнă. Çакă вĕсене çĕнтерÿçĕ пулса тăма пулăшнă та.