00:00 11 апреля 2009 г.
Чăваш Еншĕн Космонавтика кунĕ паллă уявсенчен пĕри шутланать. Андриян Николаев тĕнче уçлăхне вĕçнĕ хыççăн Чăваш Республики пирки пĕтĕм тĕнче пĕлнĕ. «Чăваш Ен; Мĕнле республика вăл;» ыйтусене Николаевăн ентешĕсем мухтавлăн хуравланă: "Виççĕмĕш номерлĕ космонавтăн çĕршывĕ!" Паллах, пирĕн мухтанмалли ытти сăлтавсем те чылай, анчах та Космонавтика кунĕ республика çыннисемшĕн Çĕнтерÿ кунĕпе пĕрех.
Кăçалхи çул Ю.Гагарин – 75 çул, А.Николаев 80 çул тултарнине паллă тунипе пĕлтерĕшлĕ. Çавăнпа та Раççей Почтин Чăваш филиалĕ ятарласа уяв ячĕпе космонавтсене тата республикăра пурăнакансене парне тунă: Шуршăлти Космонавтика музейне сăнарланă почта карточкине тата тĕнче уçлăхне халалланă конвертсемпе маркăсем хатĕрленĕ. Вĕсем кун çути курнă ĕнтĕ, кашни почта уйрăмĕнче те пур.
Çавăн пекех Космонавтика кунĕ тĕлне Раççей Почтин Чăваш филиалĕ асăнмалăх штемпель хатĕрленĕ. Ку штемпеле Шуршăлти Космонавтика музейне ыран, апрелĕн 12-мĕшĕнче, парнелĕç. Музея пыракан кашни çынах вара тĕнче уçлăхĕпе çыхăннă почта тÿлевĕн паллине туянма тата тÿлевсĕрех асăнмалăх штемпелĕн ÿкерчĕкне илме пултарать. Çак кунах Шуршăлта марка пухакансен куравĕ уçăлать. Унта паллă чăваш филателисчĕн Роман Федорович Пестовăн коллекцийĕнчи тĕнче уçлăхне халалланă 60 конвертпа паллашма пулать.
Сентябрь уйăхĕ валли, Андриян Григорьевич Николаевăн Çуралнă кунĕ тĕлне, Раççей Почтин Чăваш филиалĕ космонавтăн сăн ÿкерчĕклĕ конверт кăларма палăртать.