00:00 18 апреля 2009 г.
Вĕрентÿ министерстви тăххăрмĕш классем валли патшалăх экзаменĕсен расписанине çирĕплетнĕ. Малтанхи çулсем пекех, тĕрлĕ предметсемпе пĕтĕмлетÿ аттестацийĕ çĕнĕ йĕркепе пулать: экзаменатор вырăнĕнче – шкул учителĕсем мар, территори комиссийĕ. Районта территори комиссине палăртнă ĕнтĕ, вĕсен йышне вĕрентÿ пайĕн ĕçченĕсем тата база шкулĕсен директорĕсем кĕреççĕ.
Кăçал районĕпе тăххăрмĕш класран 129 ача вĕренсе тухать. Вĕсен тем тесен те тăватă предметпа экзамен тытмалла, вырăс чĕлхи, алгебра, чăваш чĕлхи, тăваттăмĕшне хăйĕн ирĕкĕпе суйласа илмелле. Аттестаци расписанийĕпе килĕшÿллĕн, тăххăрмĕш класра вĕренекенсем майăн 27-мĕшĕнче алгебрăпа экзамен тытĕç, июнĕн 2-мĕшĕнче – вырăс чĕлхипе, июнĕн 5-мĕшĕнче – историпе, географипе, биологипе, физикăпа, июнĕн 9-мĕшĕнче – обществознанипе, химипе, геометрипе, июнĕн 10-мĕшĕнче – чăваш чĕлхипе. Июнĕн 13-мĕшĕ резерв кунĕ шутланать. Енчен те вĕренекен суйласа илнĕ экзаменсем пĕр куна лекеççĕ пулсан, пĕринпе вăл шăпах çак кун хăйĕн пĕлĕвне тĕрĕслĕ. Экзаменсем Хĕрлĕ Чутайри вăтам шкулта иртĕç.
Тăххăрмĕш класра вĕренекенсем хăйсем мĕнле предметпа экзамен парассине суйласа илнĕ те ĕнтĕ. Акă, геометрипе экзамен 1 вĕренекен тытĕ, биологипе – 107, химипе – 11, физикăпа – 7, историпе – 30, обществознанипе – 64, географипе – 11.
Л.ЗАЙЦЕВА.