00:00 30 мая 2009 г.
АПШ-ри Лос-Анджелесра çулсерен иртекен марафон чупăвĕнче чăваш хĕрĕсем çĕнтерÿçĕсен йышне лекеççĕ. Хальхинче те вĕсем ăнăçлă ăмăртнă: Татьяна Петрова – пĕрремĕш, Сильвия Скворцова – виççĕмĕш.
2007 çулхи тĕнче чемпионачĕн кĕмĕл призерĕ Татьяна финиша 2:25:59 вăхăтра çитнĕ, унран пĕр минут каярпах – Амане Гобена (Эфиопи). Виççĕмĕш вырăна тухнă Сильвия хыççăн Раççейĕн тепĕр хĕрĕ Любовь Моргунова малтисен ретне кĕнĕ.
Лос-Анджелесри марафонăн йĕрки тăрăх, хĕрарăмсем арçынсенчен 17 минут маларах хускалаççĕ, финиш хăйăвне пĕрремĕш татнă спортсмен 100 пин доллар илет. Т.Петрова çав суммăна илме пултарнă. Анчах юлашки çухрăмра ăна Кени спортсменĕ Уэсли Корир хыçа хăварнă. Пирĕн хĕрсем парнесĕр юлман. 20 пин долларпа тата Honda Accord EX-I V 6 машинăпа Тăван çĕршыва таврăннă.
С.Ермакова