26 июля 2008 г.
Районти шкулсенче çĕнĕ вĕренÿ çулне хатĕрленеççĕ. Райадминистраци пуçлăхĕн А.Криковăн йышăнăвĕпе килĕшÿллĕн, вĕренÿ учрежденийĕсем ку енĕпе мĕнле ĕçленине тĕрĕслеме комисси туса хунă.
Хĕл кунĕсенче классемпе кабинетсене ăшăпа тивĕçтерес тĕллевпе Атнарти вăтам шкул 100 пин тенкĕлĕх икĕ котел туяннă. Пантьăкри пуçламăш шкул-ача садĕнче газ котелĕ вырнаçтарнă ĕнтĕ. Çĕн Атикассинчи вăтам шкулăн котельнăй тăррине юсаса çĕнетнĕ. Çавăн пекех Мишеркассинчи вăтам шкулта ăшă системине юсанă тата котельнăй стенисене йĕркене кĕртнĕ, Питĕркасси шкулĕнче спорт залне юсаса çĕнетнĕ.
Вĕренÿ учрежденийĕсене хĕле хатĕрлесси малалла пырать.