02 августа 2008 г.
“Победа” ял хуçалăх кооперативĕ выльăх-чĕрлĕх йышлăрах ĕрчетес, ытларах продукци туса илес тĕлĕшпе ăнăçлă ĕçлеме тăрăшать. Акă, хальхи вăхăтра Иккĕмĕш Хурашашри фермăра 88 ĕне. Кашни куллен вăтамран 15,9 килограмм сĕт антарать. Самăртма хупнă вăкăрсен ÿт хушаслăхĕ те япăх мар.
Халĕ ял ĕçченĕсем обществăлла выльăх-чĕрлĕх валли апат хатĕрлес ĕçе хастар хутшăнаççĕ. Ку таранччен хуçалăх 250 тонна утă янтланă. Ку вăл планăн 169 проценчĕ пулать. Çавăн пекех 600 тонна сенаж хывса хăварнă. Ăна технологие пăхăнса, кĕске вăхăтра траншейăна тултарнă.
Фермăра юсав ĕçĕсем те пуçланнă. Ку енĕпе ятарлă бригада йĕркеленĕ. Строительсен умне пысăк задача лартнă. Кĕр кунĕсем çитиччен вите тăррине витсе пĕтермелле, чÿрече рамисене, алăксене çĕнетмелле.
Выльăх апачĕ çителĕклĕ хатĕрлени, юсав ĕçĕсене туллин пурнăçлани ферма тупăшне ÿстерме пулăшасса шанас килет.