13 августа 2008 г.
Виçĕ саккăрлă кун районти ЗАГС пайĕнче пĕр мăшăр, Чутай пикипе Нигери çынни, хăйсен юратăвне венчет çĕрри тăхăнса çирĕплетрĕç. Ыттисем, тата 7 мăшăр, шăмат кун туй кĕрлеттернĕ. Мендельсон маршне çак кун ытларах итлеме хăнăхнăран-ши;
Çемье çавăрнă кун вăл – ĕмĕр асра юлмалли кун. Шăмат кунхи çырăнтару вара хăйне евĕрлĕ интереслĕ пул¬чĕ. Мĕншĕн тесен çав кун республикăра иртекен “Çырăнтару ритуалне чи лайăх ертсе пыраканĕ” конкурспа пĕр килчĕ. Районти ЗАГС пайĕн заведующийĕ Е.С. Барышникова конкурса хутшăннă май Хĕрлĕ Чутай пикипе Людмила Николаевна Юманкинапа Атнар каччи Дмитрий Александрович Спиридонов пĕр çемьене чăмăртаннине савăнăçлă лару-тăрура регистрацилерĕ. Мăшăрсене ылтăн çĕрĕ тăхăнса юратăва çирĕплетме сĕнчĕ, чăвашсен ырă йăли-йĕркисене пăхăнса, ашшĕ-амăшĕсене ачисене пехил пама сĕнчĕ, юратупа телей сунса çемье вучахне ĕмĕр тăршшĕпе упраса пурăнма, ача-пăчаллă пулма ăнăçу сунчĕ.
Унăн ĕçне ЧР Юстици министрĕн çумĕ, ЗАГС пайĕн начальникĕ Виталий Никитич Капитонов (конкурс председателĕ) тата комисси членĕсем хакларĕç. Вĕсем регистраци ритуалĕ çÿллĕ шайра иртнине пĕлтерчĕç, çамрăксен Çемье çулталăкĕнчи мăшăрланăвĕ çирĕп пуласса шантарчĕç.
Килĕшÿллĕ, илемлĕ, çавăн пекех телейлĕ, юратупа çиçсе тăракан мăшăрсене район пуçлăхĕ А.И.Криков та саламларĕ. Çемье çавăракансене тăванĕсем, тус-тантăшĕсем ĕмĕр-ĕмĕр çемье ăшшине упраса пурăнма юрату сунчĕç. Кив Атикассинчи хĕр пĕрчи, районти çамрăк юрăç темелле, Надежда Аксакова ылтăн çĕрĕ юрату палли пулни çинчен калакан юрă парнелерĕ.
Çак кун çуралнă çемьесене пурне те килĕштерсе пурăнма тату пурнăç сунатпăр.