13 августа 2008 г.
Паян уй-хире тухсан тыр-пулшăн пыракан хĕрÿ кĕрешĕве курма пулать. Комбайнсем çавăрса илнĕ пусăсем пĕчĕкленсех пыраççĕ. Агрегатсем патĕнчен тулли автомашинăсем йĕтем çине васкаççĕ. Халăх вăй-халĕпе, тарĕпе çитĕнтернĕ пурлăх кĕлете кĕнĕшĕн чун савăнать. Ара, пĕр хушă çанталăк çумăрлă тăни ĕç çине хутшăнакансене самаях чăрмантарчĕ. Чăваш Республикин ял хуçалăх министрĕ Михаил Игнатьев ял хуçалăх ĕçĕсене ирттерес енĕпе ĕçлекен штаб ларăвĕнче республика уй-хирĕнче тыр-пул пухса кĕртесси вăрах пынине палăртнă. Вырма хăвăртлăхĕ пĕлтĕрхи шайран юлса пыни çинчен каланă вăл.
Халĕ çанталăкĕ те уяртрĕ, уй-хирти ĕç-пуç та уçăмланчĕ. Çумăрсем пуçланиччен районти 5 хуçалăхра агрегатсем тырă пуссине тухнăччĕ. Паян пур çĕрте те комбайнсене хире кăларнă. Ял хуçалăх управленийĕнчен пĕлтернĕ тăрăх, вырсарни кун 27 комбайн пĕрчĕллĕ культурăсене пуçтарса кĕртме хутшăннă. Тунти кун та уй-хирте çавăн чухлĕ техниках ĕçленĕ.
Кăçал районĕпе пĕр¬чĕллĕ тата пăрçа йышши культурăсене 7005 гектар çинче çитĕнтернĕ. Ку таранччен 805 гектарне çулнă. Вырмалли тата 6200 гектар чухлĕ. Нумай хуçалăхсем кĕр тыррисене пухса илес тĕлĕшпе ĕçленĕ. “Нива” ЯХПК комбайнсене урпа çине кăларнă. “Мочковашский” фермер хуçалăхĕнче вара сĕлĕ çулас ĕç пырать.
Çак уйăхра кунсем кĕскелсе пыраççĕ. Çавна май вăхăтăн кашни минучĕпе туллин усă курмалла, ĕç хăвăртлăхне ÿстермелле.