13 августа 2008 г.
Иртнĕ шăмат кун, августăн 9-мĕшĕнче, Хурапырта пурăнакансем хăйсен ял уявне паллă тума пуçтарăннă. Çавна май ял çийĕн ирех юрă-кĕвĕ янăранă, халăха уява йыхравланă. Ял кунне хатĕрленсе хурапырсем утă çи вăхăтне сăнласа панă вырăн, хăна-вĕрле валли тулли сĕтел хатĕрленĕ, сăра вĕретнĕ. Культура ĕçченĕсем уяв сĕмне кĕртме тĕрлĕрен курав хатĕрленĕ. Ялти ăстаçă, З.П.Перепелкина тĕрĕçĕ хăйĕн илемлĕ эрешĕсемпе уява пухăннисене тыткăнланă.
Палăртнă вăхăт çитсен ял халăхĕ Культура çурчĕ умĕнчи уçланкăна пухăннă. Питĕркасси ял тăрăхĕн пуçлăхĕ А.Т. Дмитриев уява уçнине пĕлтерсе хурапырсене , хăнасене уяв ячĕпе саламланă. Унтан ял гимнĕ янăранă. Палăртмалла, çак кун пухăннисем пĕрремĕш хут Хурапыр ялĕн гимне итлесе киленнĕ. Ăна халăх умне çитерессишĕн Ираида Николаевнапа Юрий Витальевич Дадюковсем нумай тăрăшнă. Вĕсемех ял гербĕпе ялавне те, пичетне те хатĕрленĕ.
Анатолий Тимофеевич уява малалла тăснă май, урамсене тирпей-илем кĕртессишĕн ырми-канми тăрăшнисене палăртнă, парнесемпе хавхалантарнă. Ялти чи ватă, сумлă çынсене, кăçал кун çути курнă пепкесене те уяв парнипе чысланă. Хурапырсене ял кунĕпе район пуçлăхĕ А.И.Криков та саламланă. Районти депутатсен Пухăвĕн депутачĕ Н.С.Артемьев та тăван ял çыннисене пĕр-пĕринпе килĕштерсе пурăнма, йывăрлăхсене пĕрле çĕнтерсе пыма, уява чаплăн паллă тума ăнăçу суннă.
Унтах спорта кăмăллакансем волейболла, футболла выляса сывлăхĕсене çирĕплетнĕ. Питĕркасси ял тăрăхĕнчи пултарулăх ушкăнĕ тата Штанашри юрă-ташă ăстисем пысăк концерт лартса панă. Ял çыннисем те вĕсемпе пĕрле юрласа-ташласа савăннă. Уявпа пурте кăмăллă юлнă.