20 августа 2008 г.
Хĕрлĕ Чутайри тĕп стадионта Физкультурниксен кунне халалланă спорт ăмăртăвĕсем чылай иртрĕç. Акă, шахматла тата шашкăлла выляс енĕпе Евгений Сергеевпа Валерий Храмова çитекенни пулмарĕ. Çĕр метрлă дистанцире Наталья Герасимовапа Алексей Мадебейкин çĕнтерчĕç. 4х100 метрлă эстафетăра Хĕрлĕ Чутайри çăмăл атлетсем палăрчĕç.
Мини-футбол турнирĕнче Питĕркасси çамрăкĕсем мала тухрĕç. Юлашкинчен футболла выляса район кубокне çĕнсе илессишĕн финалти вăйăра Питĕркассинчи «Спартак» тата Уйпуçĕнчи «Тайфун» командăсем тĕл пулчĕç. Вăйă палăртнă вăхăтра 2:2 шутпа вĕçленчĕ. Çавна май турнир судьи пенальти тапма ирĕк пачĕ. Кунта вара «Тайфун» футболисчĕсем ăстарах пулни палăрчĕ. Çапла вара район кубокĕ Уйпуçсен аллине куçрĕ.
Августăн 17-мĕшĕнче пирĕн районти «Резон» футбол команди Çĕмĕрлери «Темп» футболистчĕсене йышăнчĕ. Ку вăйă республикăра мала тухассишĕн иртрĕ. Малтанах пирĕн спортсменсем хăнасене пĕр мечĕк тапса кĕрттерчĕç. Çапах та çак йывăрлăхран тухма пултарчĕç вĕсем. Михаил Антонов Çĕмĕрлесен хапхине пĕр мечĕк кĕртрĕ. Вăйă никам çĕнтерейменнипе вĕçленни «Резон» командăна турнир таблицинче тăваттăмĕш вырăнтах юлма май пачĕ.
Вырсарни кун Хĕрлĕ Чутай районĕнчи футбол ветеранĕсем Шупашкарта ЖБК-9 организацин «Рубин» командипе тĕл пулнă. Шел, вĕсене стадион хуçисем 3:1 шутпа парăнтарнă.
Çапла Физкультурниксен кунĕ ячĕпе ирттернĕ ăмăртусем вăйлисене, пултаруллисене палăртма май панă. Çамрăксем спортпа интересленни, вăй-хала тата сывлăха çирĕплетме тăрăшни савăнтарать.