20 августа 2008 г.
Чечен Республикин хăш-пĕр районĕсенче сыснасем африка чумипе чирленĕ тĕслĕхсене тупса палăртнă. Выльăхсен çак чирĕ пирĕн тăрăхра та сарăлма пултарать. Çакна шута илсе район пуçлăхĕ ятарлă йышăну кăларнă. Унта кÿршĕ облаçсемпе республикăсенчен килме пултаракан чиртен хÿтĕленмелли мерăсене палăртнă.
Ял тăрăхĕсен пуçлăхĕсен предприятисемпе учрежденисен ертÿçисем, уйрăм граждансем территорине выльăх-чĕрлĕх илсе кĕнĕ тата илсе тухнă чухне ветеринарипе санитари ыйтăвĕсене мĕнле пăхăннине тăтăшах тĕрĕслесе тăмалла. Сыснасен африка чумин çăл куçĕсем палăричченех ăна пĕтерме пурлăхпа техника хатĕрĕсем янтласа хумалла. Вĕсен шутне çаксем кĕреççĕ: дезинфекци тумалли, выльăх виллисене, тислĕкпе тĕрлĕ инвентарьсене пĕтермелли япаласем, пĕр хут тăхăнмалли хÿтĕлев костюмĕсем, выльăх виллисене турттарса каймалли михĕсем.
Ял хуçалăх предприятийĕсен ертÿçисене выльăх-чĕрлĕхе, продукцие тата чĕр тавара илсе килнĕ тата илсе кайнă чухне Чăваш Республикин, Раççей Федерацийĕн “Ветеринари çинчен” саккунне çирĕп пăхăнма, грузсем турттарма 1, 2, 3, 4 номерлĕ ветеринари свидетельствисем илме сĕннĕ. “Выльăх-чĕрлĕх чирĕсене хирĕç кĕрешекен районти станци” патшалăх учрежденийĕн дезинфекци тумалли материалсем, ятарлă костюмсем кирлĕ чухлĕ туянмалла. Çавăн пекех предприяти, учреждени тата организаци ертÿçисем, граждансем хушшинче ăнлантару ĕçне йĕркелесе ирттермелле. Выльăх-чĕрлĕх, продукци, чĕр тавар турттарма кирлĕ документсемсĕр çула тухсан штраф параççĕ.
Выльăх-чĕрлĕх продукчĕсем хатĕрлес, упрас, сутас, тĕрлĕ груз турттарас тĕлĕшпе ĕçлекен предприятисене, организацисене, суту-илÿ пасарĕсене, фирмăсене, уйрăм предпринимательсене лицензи, ветеринарин регистраци удостоверенийĕсем пулсан тата ветеринарипе санитари ыйтăвĕсене пăхăнса пырсан çеç ĕçлеме ирĕк памалла.
Шалти ĕçсен пайĕн сотрудникĕсене кирлĕ документсемсĕр çула тухнă автотранспорта патшалăх ветеринари инспекцийĕн специалисчĕсем çитиччен тытса чарма сĕннĕ. Çавăн пекех ГИБДД ĕçченĕсемпе пĕрле талăкĕпех ĕçлекен ветеринарсен тĕрĕслев посчĕсем йĕркелемелле, патшалăх ветеринари инспекторĕсене хăйсен тивĕçĕсене пурнăçланă чухне пулăшса пымалла тесе палăртнă йышăнура.