23 августа 2008 г.
Августăн 20-мĕшĕнче районта Пĕрлехи информаци кунĕ иртрĕ. Унăн теми – Чăваш Республикин 2008 çулхи çур çулĕнчи экономикăпа социаллă аталанăвĕ, бюджета мĕнле пурнăçласа пыни, вĕрентÿ учрежденийĕсем çĕнĕ вĕренÿ çулне хатĕрленни, ĕç тăвакан влаç тата вырăнти хăй тытăмлăх органĕсем обществăлла инфратытăма 2008-2009 çулсенчи кĕркуннехи-хĕллехи тапхăра хатĕрлес тĕлĕшпе мĕнле ĕçлени.
Пĕрлехи информаци кунне хутшăнма района Чăваш Республикин Вĕрентÿ тата çамрăксен политикин министрĕ Галина Чернова ертсе пыракан ушкăн килсе çитнĕ. Çав йышра ЧР Культура, национальноç ĕçĕсен, информаци политики тата архив ĕçĕн министрĕн пĕрремĕш çумĕ Виктор Бондарев, ЧР Хула строительствин тата обществăлла инфратытăм аталанăвĕн министрĕн çумĕ Александр Лепилин, патшалăх статистикин федераллă службин Чăваш Республикинчи территори органĕн ертÿçи Юрий Марков, ЧР Патшалăх Канашĕн экономика политики, агропромышленноç комплексĕ тата экологи енĕпе ĕçлекен комитечĕн председателĕ Владимир Тимофеев, Шалти ĕçсен министерствин следстви управленийĕн начальникĕн çумĕ Владимир Емельянов пулнă.
Информаци кунне хутшăнакан ушкăнсем ял тăрăхĕсене çитсе вĕрентÿ ĕçченĕсен, ял хуçалăх предприятийĕсен коллективĕсемпе курнăçнă. Тĕл пулусенче информаци кунĕн темисене хускатнипе пĕрлех Кăнтăр Осети çыннисене гуманитарлă пулăшу парас ыйтăва çĕкленĕ.
Район пуçлăхĕ Александр Криков ертсе пыракан ушкăн, ЧР Хула строительствин тата обществăлла инфратытăм аталанăвĕн министрĕн çумĕ Александр Лепилин хутшăннипе, Штанаш ял тăрăхĕнче пулнă. Тĕл пулура çул-йĕр строительствин ыйтăвĕсем çинче чарăнса тăнă. Кунпа пĕрлех ялти шкула çĕнĕ вĕренÿ çулне хатĕрлес, çурт тăррине юсас пирки тĕплĕ калаçнă.
Район пуçлăхĕн пĕрремĕш çумĕ, ял хуçалăх, экономика, пурлăх тата çĕр хутшăнăвĕсен управленийĕн начальникĕ Алексанр Самылкин ертсе пыракан ушкăнти ĕçлĕ çынсем – районти социаллă хÿтлĕх пайĕн начальникĕ Вера Ярабаева, коммуналлă хуçалăх предприятийĕн начальникĕ Петр Столяров, ЧР Патшалăх Канашĕн экономика политики, агропромышленноç комплексĕ тата экологи енĕпе ĕçлекен комитечĕн председателĕ Владимир Тимофеев Тралькасси ял тăрăхĕнчи çынсемпе тĕл пулчĕç.
...Йĕтем çинче – хĕрÿ ĕç. Уй-хирте комбайнсем вырса пухнă тырă кунĕпех килсе тăрать. Ăна 23 çынран йĕркеленĕ ятарлă бригада виçĕ сортировкăпа тасатать. Çавăн пекех вăрлăх хатĕрлемелли агрегат та пур. Кĕлете кĕртмелли тырра автомашина çине погрузчик пулăшнипе тиеççĕ. Пĕтĕм техникăна Николай Судеркин, Владимир Ильин, Николайпа Анатолий Гурьяновсем пăхса тăраççĕ, унпа тухăçлă усă курма тăрăшаççĕ.
– Эпир тырă тасатса кĕртес ĕçе кăçал уйрăмах лайăх йĕркелерĕмĕр, – тет йĕтем заведующийĕ Сергей Чернов. – Опытлă çынсене пухрăмăр, вĕсен ĕç дисциплини пысăк. Акă, Лилия Апалеева, Евгений Майоров, Александр Горшков тата ыттисем те пĕр çул кăна ĕçлемеççĕ кунта.
Сăмах май, хуçалăх пĕрчĕллĕ тата пăрçа йышши культурăсене пухса кĕртес ĕçе кĕçех вĕçлет. Паян уй-хирте 5 комбайн ĕçлет. Ку таранчен 450 гектар ытла тырă вырнă. Гектар тухăçĕ 24,5 центнерпа танлашать.
Ĕç çи йĕркеллĕ пырать темелле. Анчах та çынсем хăйсен пăшăрханăвне те палăртрĕç. Акă, Карăкçырми ялне шкул автобусĕ çÿремест. Асфальт сарса хытарнă çул пур-ха, шел, унăн сарлакăшĕ ансăртарах, кирлĕ чухлĕ çук-мĕн. А.Самылкинпа В.Тимофеев çак ыйтăва пăхса тухма шантарчĕç.