27 августа 2008 г.
Республикăри массăллă информаци хатĕрĕсем темиçе кун каялла кăна август уйăхĕн 8-мĕшĕнче Грузи çарĕсем Кăнтăр Осетире пуçланă вăрçăра Чăваш Енрен хĕсмете кайнă салтаксенчен никам та вилменни çинчен пĕл¬терчĕç. Шел, тĕрĕс пулман çак хыпар.
Цхинвал хули çывăхĕнче август уйăхĕн 11-мĕшĕнче Кавказ тăвĕсен хушăкне васкавлă тухса кайнă Псковри 106-мĕш сывлăш-десант дивизийĕн пысăках мар ушкăнĕнчи хĕрĕх ытла салтакĕпе офицерĕ тан мар çапăçура вилнĕ тата йывăр аманнă. Вĕсен хушшинче Шупашкар районĕнчи Хĕрлĕçыр ялĕнче çуралса ÿснĕ, Алькешри вăтам шкула пĕтернĕ В.Егоров прапорщик та пулнă. Йывăр аманнă Владимира çав кунхинех каçхине вертолетпа Дон çинчи Ростоври çар госпитальне ăсатнă. Тепĕр икĕ кунран Владимирăн чĕри яланлăхах тапма чарăннă.
Унăн ашшĕ, Аверкий Егоров, чĕрĕк ĕмĕр ытла Шупашкарти “Стройкерамика” производство пĕрлешĕвĕнче водительте ĕçленĕ. Çак предприятирен пурĕ те пĕр çухрăмри Алькеш поселокĕнче хăй вăхăтĕнче мăшăрĕпе Зинаида Семеновнăпа тăванĕсем пулăшнипе кирпĕч çурт çĕкленĕ. Кунта вĕсен пĕртен-пĕр ывăлĕ вунă çул ытларах пурăнма ĕлкĕрнĕ. Вун тăватă çул каялла Владимир Шупашкар хулин Калинин çар комиссариачĕ урлă çара кайса десантник тумне тăхăнать. Темиçе хутчен те Чечняри вăрçа хутшăннă В.Егоров “Çапăçури паттăрлăхшăн” медале тивĕçнĕ.
Сакăр çул каялла чăваш каччи контракт йĕркипе хĕсмете тепĕр хут каять, каллех Псковри 106-мĕш сывлăш-десант дивизине лекет. Кунтах вăл вырăс хĕрĕпе Ольгăпа паллашса çемьеллĕ пулать. Вĕсен аслă хĕрĕ Аня ултă çулта, кĕçĕн хĕрĕ Настя вара çичĕ уйăхра кăна-ха. Икĕ эрне каялла Ольга Николаевна савнă упăшкасăр, Аньăпа Настя ашшĕсĕр тăрса юлчĕç...
Паттăр салтак-ентеше, мире хÿтĕлекенсен уйрăм батальонĕнче хĕсметре пулса паттăррăн пуç хунă В.Егорова Алькеш поселокĕпе Вăрманкас ялĕ хутлăхĕнчи масарта пытарнă.