03 сентября 2008 г.
Тунти кун районти 2028 ачана шкул ытамне чĕнсе савăнăçлă шăнкăрав янăрарĕ. Унăн асамлă та сăваплă сасси 152 пĕчĕк чуна пĕрремĕш хут парта хушшине ларма йыхравларĕ.
Атнар
Сентябрĕн 1-мĕшĕ – ачасене пĕлÿ тĕнчине çул уçса паракан уяв. Тунти кун Атнар вăтам шкулĕнче çĕнĕ вĕренÿ çулĕ пуçланнă май ирттернĕ савăнăçлă линейка çакна аван çирĕплетсе пачĕ. Сивĕ, тĕксĕм çанталăк та шкул ачисен кăмăл-туйăмне тĕксĕмлетеймерĕ. Пĕрремĕш класа пуçласа пынисем паян уйрăмах савăнăçлă. Тахçантанпах кĕтнĕ кун çитрĕ – вĕсемшĕн шкул алăкĕ яриех уçăлчĕ.
Район пуçлăхĕ Александр Криков ачасене саламласа лайăх вĕренме, спортпа туслă пулма сĕнчĕ, пĕрремĕш класа килнисене парнесем пачĕ. Атнар ял тăрăхĕн пуçлăхĕ Александр Кузнецов пухăннисене çĕнĕ вĕренÿ çулĕ пуçланнă ятпа ăшшăн саламларĕ, вĕренекенсене парнесемпе чысларĕ. Шкула теннис вăййин пуххине, çавăн пекех тирпей-илемшĕн тăрăшма чĕнсе çÿп-çап пухмалли 5 карçинкка пачĕ. Общество ĕçне активлă хутшăнакан учительсене Тав хучĕсемпе хавхалантарчĕ. “Коминтерн” ял хуçалăх производство кооперативĕн директорĕн çумĕ Николай Воронов уй-хир ĕçĕнче хастарлăх кăтартнă вĕренекенсене укçан преми пачĕ.
Саламсем вĕçленсен шăнкăрав ачасене урока йыхăрчĕ. Район пуçлăхĕ А.Криков вĕсемпе пĕрле малтанхи урока хутшăнчĕ. Аслă классене вăл Ырă ĕçсен çулталăкне активлă хутшăнма, ырă ĕçсем нумайрах тума чĕнсе каларĕ.
Хĕрлĕ Чутай
Вăтам шкулта вĕренекенсем çанталăк сивĕ те çумăрлă пулнă пирки спорт залĕнче класăн-класăн йĕркеленсе тăчĕç. Шкул директорĕн çумĕ Л.Кашкирова савăнăçлă линейка уçăлнине пĕлтерчĕ, унтан Раççей гимнĕ янăрарĕ. Шкул директорĕ Р.Ильина пухăннисене вĕренÿ çулĕ пуçланнă ятпа саламларĕ, иртнĕ вĕренÿ çулĕн кăтартăвĕсемпе кĕскен паллаштарчĕ. Кăçал шкулта 622 ача пĕлÿ илме пуçланине, вĕсенчен 42-шĕ пĕрремĕш класа каякансем пулнине пĕлтерчĕ. Шкулти педагогсем ачасене пахалăхлă пĕлÿ парас, «Вĕрентÿ» наци проектне пурнăçа кĕртес тесе тăрăшнине асăнчĕ. Е.Орлова биологи учительне кăçал РФ Президенчĕн хушăвĕпе килĕшÿллĕн «Раççей Федерацийĕн тава тивĕçлĕ учителĕ» ята тивĕçнипе саламларĕ. Раиса Николаевна ĕçпе палăрнă, районта иртнĕ олимпиадăсен çĕнтерÿçисене хатĕрленĕ учительсене те Хисеп грамотисем парса чысларĕ. Çавăн пекех шкул пурнăçĕпе тачă çыхăну тытнă районти предприятисемпе организацисене, уйрăм çынсене тав сăмахĕ каларĕ.
Район пуçлăхĕн çумĕ, райадминистрацин вĕрентÿ пайĕн начальникĕ Т.Шереметьева пухăннисене Пĕлÿ кунĕ ячĕпе саламланă май шкул ачисен паян вĕренме майсем çителĕклине, Чăваш Республикинчи вĕрентÿ аталанăвĕн 2040 çулчченхи Стратегийĕн тĕп тĕллевĕ вĕçĕмсĕр, тăтăш вĕренни пулнине каларĕ. Малалла Татьяна Николаевна республикăра тата районта иртнĕ тĕрлĕ конкурссемпе фестивальсенче çĕнтернĕ шкул ачисемпе учительсене Дипломсем, грамотăсемпе свидетельствăсем парса савăнтарчĕ. Çавăн пекех вăл пĕрремĕш класа каякансене райадминистраци ячĕпе парнесем пачĕ. Хĕрлĕ Чутай ял тăрăхĕн пуçлăхĕн çумĕ О.Максимов та ачасене парнесем парса саламларĕ. Райпо председателĕ А.Степанов çуллахи каникул вăхăтĕнче кивĕ хут, эмел курăкĕсем нумай пухнă ачасене Хисеп грамотисемпе укçа парса хавхалантарчĕ.
Виççĕмĕш класра тата аслă классенче вĕренекенсем пухăннисене саламласа хăйсен пултарулăхĕпе паллаштарнă хыççăн 1-мĕш класа каякан В.Архиповапа 11-мĕшĕнчи А.Васюков пĕрремĕш шăнкăрава янăратрĕç.
Мăн Этмен
Вăтам шкула ăс-тăн пухма çÿрекенсемпе вĕрентекенсем Пĕлÿ кунне çĕкленÿллĕ кăмăл-туйăмпа кĕтсе илчĕç. Капăр çи-пуçлă ачасен пит-куçĕнче – савăнăç шевли, хĕпĕртÿ туйăмĕ тĕрлĕ тĕспе ялкăшакан чечексемпе пĕрлешсе каять. Савăнăçлă линейкăна шкул директорĕн воспитани парас енĕпе ĕçлекен çумĕ В.Ярабаев уçрĕ: пухăннисене çĕнĕ вĕренÿ çулĕ пуçланнă ятпа ăшшăн саламларĕ. Акă, хĕрлĕ ялав флагшток тăрăх çÿлелле хăпарать, ăна иртнĕ вĕренÿ çулĕнче палăрнă ачасене çĕклеме ирĕк пачĕç.
Шкул директорĕ М.Ярадаева кăçал 16 ачана пуçласа йышăнасси çинчен хушу вуласа пачĕ, пепкесене асăнмалăх парнесемпе чысларĕ. Çавăн пекех вăл 10-мĕш класра 36 ача пĕлÿ илме тытăнасси пирки пĕлтерчĕ. Тĕрлĕ предметсемпе районти олимпиадăсенче çĕнтернĕ вĕренекенсене Дипломсем пачĕ. Малашне те лайăх ĕлкĕрсе пыма, наукăн çутă тÿпине штурмлама чĕнсе каларĕ.
Пĕрремĕш класа пынисем хăйсен аслă юлташĕсене юрăпа саламларĕç. Вĕсем çине пăхатăн та шухăшлатăн – паянтан пурин те вĕренÿ çулĕ пуçланать. Паян пурте коллективăн пĕр тан праваллă членĕсем пулса тăраççĕ. Вăхăт иртнĕ май пурнăçăн анлă çулĕ çине тухĕç. Пĕрремĕшсене 11-мĕш классем саламласан çакă чун-чĕрене уйрăмах тарăн кĕрсе вырнаçнине туйса илме пулчĕ. Сăмах май, çитес çул 43 вĕренекен алла аттестат илĕ.
Çакна та палăртса хăварас килет. Чăваш Республикин тата Раççей Федерацийĕн Президенчĕсен гранчĕсене çĕнсе илнĕ Н.Ермакова учительница халĕ Мăн Этмен шкулĕнче ĕçлеме тытăнать. Ку вĕрентекенсен йышне çĕнĕ вăй хутшăннине пĕлтерет ĕнтĕ.
Çавăн пекех вĕрентÿ пайĕн психологипе педагогика пулăшăвĕн центрĕн заведующийĕ А.Савельева, Мăн Этмен ял тăрăхĕн пуçлăхĕ Л.Сергеева, “Нива” хуçалăх бухгалтерĕ З.Воронова, фермер хуçалăхĕн ертÿçи В.Никитин пухăннисене çĕнĕ вĕренÿ çулĕ ячĕпе саламласа учительсене Грамотăсемпе наградăларĕç, пĕрлешÿллĕ предприятисене пулăшнă ачасене парнесемпе савăнтарчĕç.
Райадминистраци ячĕпе районти ял хуçалăх пайĕн начальникĕ Н.Коробков çамрăк ăрăва тата вĕрентекенсене саламларĕ, ырлăх-сывлăх сунчĕ.
Шăнкăрав янăраса кайрĕ те ачасем пĕрремĕш урока васкарĕç...