03 сентября 2008 г.
Тырă пулсан, пурнăç пулать тетпĕр. Сĕтел çинче çăкăр татăлмасан халăх пуянлăхĕ те иксĕлмест. Çакна тĕпе хурса «Нива» ял хуçалăх производство кооперативĕн ĕçченĕсем кăçалхи вырмара пысăк хастарлăх кăтартрĕç. Уй-хирте пилĕк комбайн ĕçлерĕ. Механизаторсем шанса панă техникăпа туллин усă курчĕç. Вĕсем августăн 26-мĕшĕнче 661 гектар çинчи пĕрчĕллĕ тата пăрçа йышши культурăсене пĕтĕмпех вырса пĕтернĕ.
Кĕлетсене пурĕ 1497 тонна тырă кĕртнĕ. Кашни гектар 22,7 центнер тухăç панă. Хуçалăх 110 тонна çĕнĕ тырă сутнă. Çав шутран тулă 60 тонна.
Кооператив тилхепи çамрăк ертÿçĕ Владимир Мурайкин аллинче. Хăйĕн пуçарулăхĕпе, тăрăшулăхĕпе палăрнă специалист вăл. Ĕç ăнăçлăхĕ йыша пĕр чăмăра пĕрлештернинчен, ĕçлекенсене укçа-тенкĕпе тата пурлăхпа тĕрĕс хавхалантарнинчен нумай килет.
Августăн 26-мĕшĕнчех Питĕркасси ял тăрăхĕнчи «Прогресс» СПОК та вырмана вĕçленĕ. Уй-хиртен 116 тонна тĕш тырă пуçтарса кĕртнĕ.