24 сентября 2008 г.
Ĕнер Чăваш патшалăх гуманитари ăслăлăхĕсен институтĕнче Пĕтĕм Раççейри «Раççей регионĕсен социокультура портречĕсем: вĕсене комплекслă майпа пурнăçа кĕртнин опычĕ» IV ăслăлăх-практика конференцийĕ иртрĕ. Ăна çул параканĕ, йĕркелесе пыраканĕ – Раççей наукăсен академийĕн Философи институчĕн социокультура улшăнăвĕсене тĕпчекен центрĕ. Çавна май унăн ертÿçи, философи ăслăлăхĕсен докторĕ Н.И.Лапин профессор та кунтах пулчĕ. Конференцие тĕрлĕ регионтан 24 ăсчах хутшăнчĕ. Вĕсен йышĕнчен çаксене палăртма пулать: Тюмень патшалăх университечĕн экономика социологийĕн кафедрин пуçлăхĕ, социологи ăслăлăхĕсен докторĕ В.А.Давыденко, Тюмень облаç Думин Председателĕн çумĕ, социологи ăслăлăхĕсен кандидачĕ Г.С.Корепанов, Курск патшалăх университечĕн социологи тĕпчевĕсен пайĕн пуçлăхĕ, философи ăслăлăхĕсен докторĕ Е.А.Когай, Урал патшалăх сăрт-ту университечĕн социологи лабораторийĕн ертÿçи, философи кафедрин пуçлăхĕ И.А.Кох, Хусан патшалăх технологи университечĕн кафедра пуçлăхĕ, политика ăслăлăхĕсен докторĕ А.Л.Салагаев тата ыттисем.
Конференци теми кăсăклă çеç мар, питĕ пĕлтерĕшлĕ те. Унта тапратакан ыйтусемпе калаçакансем те ăслăлăх ĕçĕнче пысăк шая çĕкленнĕ çынсем. Çаксене шута илсех пулĕ конференци ĕçне ЧР Президенчĕ Н.В.Федоров та хутшăнчĕ. «Эпĕ эсир хускатакан ыйтусенче хам валли кирлине, уссине тупасса шанатăп», – терĕ Николай Васильевич.
Н.И.Лапин тунă доклада («Регионсен социокультура тĕпчевĕсене йĕркелесси») итленĕ хыççăн Николай Федоров ăсчаха асăрхаттару турĕ. Акă мĕншĕн: тĕпчев тăвакансем пурнăçран кая юлса пынăшăн. Вĕсем 2000 çулхи кăтартусемпе усă курнă. Пурнăç вара улшăнсах, çĕнелсех пырать, кăтартусем те кивелеççĕ. Сăмахран, çын пултарулăхĕн шайĕ аталаннине палăртакан таблицăра Чăваш Ен вăтаммисен йышĕнче тăрать тенĕ. Ку – 2000 çулхи кăтарту терĕмĕр. Николай Васильевич вара республикăра çак тапхăрта вĕрентÿÿ, сывлăх сыхлавĕ тата ытти енĕпе тунă ĕçсене туллин илсе кăтартрĕ. Хальхи вăхăтра пурнăçлакан программăсене – кашни яла асфальт çулпа çыхăнтарас, таса шывпа тивĕçтерес тĕлĕшпе çыхăннисем пирки – аса илчĕ.
Президент конференци ĕçне хĕрÿлĕх кĕртнĕ хыççăн сăмах илекенсем, ун çумне хушса калаçакансем чылай пулчĕç. Ун хыççăн секцисене пайланса ĕçлерĕç.