24 сентября 2008 г.
Чăваш Республикин Президенчĕн Н.В.Федоровăн кăçалхи сентябрĕн 15-мĕшĕнчи 128-рп номерлĕ Указĕпе килĕшÿллĕн Хĕрлĕ Чутайри вăтам шкулта 10 А класра ăс пухакан Валентина Улянды лайăх вĕрен¬нĕшĕн тата творчествăлла ăнтăлушăн Чăваш Республикин Президенчĕн стипендине уйăхсерен илсе тăма тивĕçнĕ. Сăмах май, Валентина кĕçĕн классенчен пуçласа «5» паллăсемпе кăна ĕлкĕрсе пырать. Вăл шкулта иртекен пур предметлă конкурссене те («Русский медвежонок», «Чувашская ласточка», «Кенгуру», «Английский бульдог»...) активлă хутшăннине, вĕсенче лайăх балсем пухнине палăртмалла. Çавăн пекех Валентина районти предметлă олимпиадăсене тăтăшах хутшăнать. Акă, 2007-2008 вĕренÿ çулĕнче хĕр биологипе, технологипе тата вырăс чĕлхипе иртнĕ олимпиадăсенче пĕрремĕш вырăн йышăннă. Республикăри олимпиадăра вара биологипе 2-мĕш вырăна тивĕçнĕ. В. Улянды вырăс чĕлхипе тата биологипе наукăпа практика конференцине хатĕрленес тата ирттерес ĕçре те яланах активлă.
Валентина – районти искусство шкулĕн пĕлÿ пухаканĕ, Хĕрлĕ Чутай салин Крестовоздвижени чиркĕвĕ çумĕнчи вырсарни шкулĕн пĕлÿ пухаканĕ. Çавăн пекех вăл искусство шкулĕн «Святая Русь» ансамблĕн солистки. Палăртмалла, асăннă ансамбль республикăри чылай конкурса хутшăнса пĕрре мар Дипломсене тивĕçнĕ, вĕсене асăнса та çитереес çук.
Хĕр класра староста пулăшуçи пулнине те асăнмалла, çавăн пекех вăл шкулта аслă классенче вĕренекенсен Канашĕн йышне кĕрет, культура министрĕ шутланать. 2006-2007 вĕренÿ çулĕнче Валентина Чăваш Республикин Патшалăх Канашĕн депутачĕн, «Ядринмолоко» УАО генеральнăй директорĕн Н.В.Маловăн ятран паракан стипендине илсе тăнă.
Малашне те пикене вĕренÿре ăнăçу, творчествăлла ÿсĕмсем тата çĕнĕ çитĕнÿсем сунатпăр.