08 октября 2008 г.
Районти хуçалăхсем уй-хир ĕçĕсене вĕçленĕ май ял хуçалăх техникине управа лартас, машина-трактор паркĕсене йĕркене кĕртес, инженери культурине ÿстерес, машинăсене юсас, техникăлла пулăшу парас, пурлăх никĕсне пуянлатас тата патшалăх техника асăрхавĕн инспекцийĕ енчен тĕрĕслев ĕçне вăйлатас тĕллевпе 2008 çулхи октябрĕн 1-мĕшĕнчен пуçласа 24-мĕшĕчченхи тапхăрта техника паркĕсенчи лару-тăрăва тĕрĕслеме йышăннă. Çак вăхăтра пур çĕрте те “Ял хуçалăхĕнче усă куракан техника. Упрамалли правилăсем” ГОСТ 7751-85 ыйтнине çирĕп пурнăçласа пымалла. Кунпа пĕрлех ял хуçалăх техникине комплектланине, ГОСТ-па килĕшÿллĕн ăна нумайлăха управа лартас ĕçе мĕнле йĕркеленине пысăк тимлĕх уйăрмалла. Территоринчи тимĕр-тăмăра илсе тухассине йĕркелемелле, ĕç сыхлавĕпе хăрушсăрлăх техникин правилисене пурнăçламалла.
Машина-трактор паркĕсенчи лару-тăрушăн хуçалăхсене ертсе пыракансемпе инженерсем яваплă. Çакна асра тытмалла – хĕллехи управа йĕркеллĕ лартнă техника ĕмĕрĕ кĕскелмест, ăна кирлĕ пек юсасан-тÿрлетсен çитес çул унăн ĕç тухăçлăхĕ пысăк пуласса шанма пулать.
Тĕрĕслев кăтартăвĕсене патшалăх техника асăрхавĕн инспекцийĕ пĕтĕмлетет.
Çакна палăртса хăварни кирлĕ. Чăваш Республикинчи патшалăх техника асăрхавĕн инспекцийĕ агропромышленность комплексне кĕрекен организацисем, çавăн пекех хресчен (фермер) хуçалăхĕсем хушшинче техникăна управа лартас тĕлĕшпе смотр-конкурс ирттерме палăртнă. Унта пур район та хутшăнма тивĕç. Çĕнтерÿçĕсене Чăваш Республикин Ял хуçалăх министерствин комиссийĕн йышăнăвĕпе тата смотр-конкурс ирттермелли Положенипе килĕшÿллĕн парнесемпе чыслаççĕ.