18 октября 2008 г.
Кăçалхи октябрĕн 10-11-мĕшĕсенче Канаш хулин «Локомотив» стадионĕнче призыв çулне çитмен çамрăксен республикăри Спартакиади иртнĕ.
Ăмăртăва 1991-1994 çулсенче çуралнă яш-кĕрĕм хутшăннă. «Лайăххисенчен чи лайăххи» ята илессишĕн 20 команда кĕрешнĕ. Спортсменсем çарпа спорт, полиатлон, çар эстафети енĕпе вăй виçнĕ. Çавăн пекех автомат сÿтсе пуçтарас, стройпа утас тĕлĕшпе те хăйсен ăсталăхне кăтартнă.
Çарпа спорт вăййисем вĕçленсен унăн кăтартăвĕсене пĕтĕмлетнĕ. Пирĕн район чысне хÿтĕлекен команда çар блокĕнче çĕнтерÿçĕ пулса тăнă. Икĕ кунхи кĕрешÿ кăтартăвĕсем тăрăх вара иккĕмĕш вырăн йышăннă.
Район чысне Хĕрлĕ Чутай вăтам шкулне çÿрекенсем хÿтĕленĕ. Вĕсем кăçалхипе виççĕмĕш хут призыв çулне çитмен çамрăксен Спартакиадинче умлă-хыçлă кĕмĕл медаль çĕнсе илнĕ. Çак ÿсĕмре Раççей Федерацийĕн Президенчĕн грантне тивĕçнĕ ОБЖ преподавателĕн Эдуард Романовăн тÿпи пысăк. Вăл ертсе пынипе унăн вĕренекенĕсем çÿлленех районти тата республикăри конкурссенче малти вырăнсене йышăнаççĕ. Акă, 2007 çулта вĕсем çамрăк армеецсен XXXX-мĕш финалти вăййисене хутшăнса пĕчĕк калибрлă винтовкăран тĕл перессипе иккĕмĕш вырăна тухнăччĕ.
Чутайсен командинче 9 “а”, 10 “а”, 10 “б” классенчи яшсем ăмăртнă. Артур Богатнаев, Эдуард Дадюков, Петр Еклаков, Валерий Иосифов, Евгений Казаков, Сергей Трифонов, Юрий Филиппов, Евгений Яковлев, Петр Гусельщиков, Евгений Борисов, Иван Ефимов çитĕнÿсем тума пултарнă. Район команди, акă, стройпа утассипе пĕрремĕш, автомат сÿтсе пуçтарассипе виççĕмĕш вырăн йышăннă. П.Гусельщиков вара автомат сÿтсе пуçтарассипе 60 яш хушшинче иккĕмĕш вырăна тухнă. Уйрăм зачетра, пневматикăлла винтовкăран тĕл перессипе Ю.Филиппов 50 очкоран 46-шне пухса полиатлон вăййине хутшăннă 140 çамрăкран пĕрремĕш вырăн йышăннă.
Команда ЧР Физкультурăпа спорт тата туризм министерствин дипломĕсемпе кубокĕсене, медалĕсене илсе таврăннă.
Район чысне хÿтĕлесе ачасем юлашки тăватă çул хушшинче республикăра лайăх кăтартусем тунине палăртма кăмăллă. Тĕпрен илсен, çамрăк армеецсен аслă ушкăнĕнче вĕренекенсем Чăваш Енри чи вăйлă пилĕк команда йышне кĕме пултарнă. Виçĕм çул çавăн пекех «Зарница» вăййинче хĕрлĕчутайсем республикăра пĕрремĕш вырăна тухнă. Кун пек çитĕнĕве районăн 39 çулхи историйĕнче пĕрремĕш хут тунине палăртса хăвармалла.
Çарпа спорт вăййисене хутшăнни, ăмăртусенче лайăх кăтартусем туни çамрăксен ăс-тăнне пуянлатма, вăй-халне çирĕплетме пулăшать. Вĕсем Раççей çарĕн ретне тăма шкул çулĕсенчех хатĕрленни чăннипех те савăнтарать.