01 ноября 2008 г.
Паянхи кун районта спортăн нумай енĕсемпе ăмăртусем иртеççĕ. Штанашри тĕп шкулти спортсменсем, Иван Иванович Сатлайкин физкультура учителĕ ертсе пынипе, пĕр тупăшуран та юлмаççĕ, чылай чухне малти вырăнсене тивĕçеççĕ. Çакăнта физкультура учителĕ çитĕнекен ăрăва спорта юратма хăнăхтарассишĕн, ачасене ăмăртусене хутшăнма майсем туса парассишĕн, ыттисемпе танлаштарсан, ытларах тăрăшнине палăртмалла.
Иван Иванович тăрăшнипех Штанаш ял тăрăхĕнчи çамрăксем волейболла ăста выляççĕ. «Заря» командăпа тĕл пулса вылямалла тесен, ытти ушкăнсем тÿрех штанашсене парăнтарма йывăррине, кĕрешÿ çивĕч пулассине туйса тăраççĕ.
Сăмах май, И.И.Сатлайкинăн ĕç опычĕ те пысăк ĕнтĕ – физкультура урокĕсене 20 çул ертсе пырать. Тумликасси ялĕнче çуралнăскер, ача чухнех спорта кăмăлланă, çав енĕпех пĕлĕвне ÿстернĕ. Вĕренсе тухнă хыççăн, дипломлă специалиста Штанаш шкулне ĕçлеме янă. Кайран унтах çемье çавăрнă. Паянхи кун та Штанаш ял тăрăхĕнчи çамрăк ăрăва сывă пурнăç йĕркине хăнăхтарассипе, физкультурăпа спорта юратма вĕрентессипе тăрăшать.
Пĕр ăмăртура Иван Ивановичпа тĕл пулса калаçрăмăр. Спорт унăн пурнăçĕнче мĕнле вырăн йышăннине ыйтса пĕлтĕм.
– Физкультура учителĕн профессине суйласа илнишĕн ÿкĕнместĕп. Сывлăх çирĕп, ĕçлеме вăй-хал çителĕклĕ. Мана ачасемпе ĕçлеме килĕшет. Эпĕ вĕрентнĕ ачасем спортăн тĕрлĕ енĕсемпе аталанса пыраççĕ. Район шайĕнчи ăмăртусенчен Хисеп грамотисемсĕр килмен эпир. Спортсменсем ÿсĕмсем тусах пыраççĕ. Вĕсем ăнăçу туни учителе те савăнтарать. Çакă – чи пахи, – терĕ И.И.Сатлайкин.
Спортшăн чунне пама хатĕр педагог çемйипе те ăмăртусене час-часах хутшăнать. Нумай пулмасть Иван Ивановичпа Елена Анатольевна Сатлайкинсем тата вĕсен Ирина хĕрĕ çăмăл атлетсен спорт çемйисен тупăшăвĕнче пĕрремĕш вырăн çĕнсе илчĕç.
Çапла, юратнă ĕç – чун канăçĕ, теççĕ. И.И.Сатлайкин – спорта чунпа парăннă çын. Апла пулсан пур-ха пирĕн хушăра ырă тĕслĕх илмелли çынсем.