01 ноября 2008 г.
Таçти çичĕ ютра инкек пулать – чăваш шар курать. Хурлăхлă çак пĕтĕмлетÿ нумаях пулмасть Пермьри авиакатастрофăпа черетлĕ хут çирĕпленчĕ. Тепĕр тĕслĕх – октябрь уйăхĕн 26-мĕшĕнче Тутарстанра пулнă инкек.
Вырсарни кун кăнтăрла хыççăн 14 сехет те 7 минутра кÿршĕллĕ республикăн Зеленодольск районĕнче, Хусантан 12 километрти Çĕнĕ Тура текен коттедж поселокĕнче, нумай тĕллевпе усă курмалли МИ-17 çар транспорт вертолечĕ ÿксе арканнă. Экипажăн 5 членĕнчен 4-шĕ вилнĕ: командир, бортинженер, штурман тата тĕп инженер. Пĕри çеç чĕрĕ юлнă – вертолетăн иккĕмĕш пилочĕ Ринат Галимов 100 метр çÿллĕшĕнчен парашютпа сиксе ĕлкĕрнĕ. Чăн та, ытла та пĕчĕк çÿллĕшĕнчен сикнĕ май парашют пĕтĕмпех уçăлса çитеймен, çавна май вăл та йывăр суранланнă, çапах унăн пурнăçĕ тинех хăрушлăхра мар ĕнтĕ.
Арканнă МИ экипажăн командирĕ 56 çулти Петр Чумаков – пирĕн ентеш, Канаш районĕнчи Çĕнĕ Ахпÿрт ялĕнче нумай ачаллă çемьере çуралса çитĕннĕ летчик.
Çав кун Хусанти вертолет завочĕн машини сăнав вĕçевне çĕкленнĕ. Чĕрĕ юлнă Р.Галимов каланă тăрăх, завод аэродромĕнчен вĕçсе тухнă хыççăн пилĕк-çичĕ миутранах 300 метр çÿллĕшĕнче вертолет управленине çухтнă, командир экипажа парашютпа сикме хушнă. Хăй вара машинăпа сыв пуллашма васкаман. П.Чумаков МИ пурăнмалли çуртсем çине ÿкесрен сыхланнă-тăр. Çапла тума май килнĕ – машина çуртсем çук çĕре, çул çине, ÿксе арканнă, тивсе кайнă. Экипаж членĕсен пурнăçне çăлма май килмен.
«Татар-информ» агентстви пĕлтернĕ тăрăх, РФ прокуратури çумĕнчи Следстви комитечĕн транспорт çинчи управленийĕ ку тĕслĕхпе уголовнăй ĕç пуçарнă. Инкек сăлтавĕсене тĕпчеме следстви ушкăнĕ туса хунă. Тĕпе хуракан версисем – оборудовани чăхăмлани е машинăпа тĕрĕс усă курманни. Юлашки версие летчиксен ĕçтешĕсем хирĕçлеççĕ. П.Чумаков опытлă, ăста, яваплăх çинчен нихăçан та манман летчик пулнă, патшалăх наградисене тивĕçнĕ. Оборудовани шанчăклăхĕ тĕлĕшпе вара иккĕленÿ пур: кивĕ мар пулин те машина юсавра пулнă-мĕн, ăна двигательне сÿтнĕ хыççăн тĕрĕслесе пăхма шăпах Чумаков экипажне шаннă...
Летчикпе сыв пуллашма, хуйха унăн çемйипе пĕрле пайлама ентешĕмĕрĕн Чăваш Енри тăванĕсем те Хусана кайнă – П.Чумакова юн кун унта пытарнă.