12 ноября 2008 г.
Шкула çÿрекен кашни ачан юратнă учителĕ пур. Акă, Хĕрлĕ Чутай вăтам шкулĕнче технологие тата ИЗО искусствине, тĕнче художествăллă культурине вĕрентекен Ирина Евгеньевна Захарована илер. Вĕренекенсем тата выпускниксем юратнă учитель пирки ялан ырă калаççĕ. Вăл чăннипех шкулти чи пултаруллă вĕрентекенсенчен пĕри. Ирина Евгеньевна педагогика ĕçĕнче 1989 çултанпа тимлет. Сăмах май, кăçалхи вĕренÿ çулĕ пуçламăшĕнче ăна пархатарлă ĕçсемшĕн, чăн-чăн педагогика ăсталăхне кăтартнăшăн, инноваци мелĕпе ĕçлесе вĕрентÿре ÿсĕмсем тунăшăн РФ Вĕрентÿпе ăслăлăх министерствин Хисеп грамотипе чысларĕç. Çакă учителе татах та творчествăлла ĕçлеме хавхалантарать.
Ирина Евгеньевнан ачалăхĕпе çамрăклăхĕ Çĕмĕрле районĕнче иртнĕ. Ашшĕпе амăшĕ ачасене ĕçе хăнăхтарса ÿстернĕ, сăпайлăха вĕрентнĕ. Хĕр ача çамрăклах ÿкерме юратнă, ал ĕçне кăмăлланă. Хăй ăсталанă япаласемпе мăнаçланнă. Малалла та пурнăçа çак енпе çыхăнтарнă. Вăтам шкул пĕтерсен хĕр Шупашкарти И.Я.Яковлев ячĕпе хисепленекен Чăваш патшалăх педагогика институне художествăпа графика факультетне вĕренме кĕрет. Ун хыççăн ĕç стажне Çĕмĕрле районĕнче пуçлать. 1991 çулта пĕр факультетра пĕрле вĕреннĕ, пĕр специальноçах алла илнĕ педагогпа, Владимир Александрович Захаровпа, пĕрлешсе çемье çавăрнă. Çавăнтанпа икĕ вăй питти çамрăк Хĕрлĕ Чутайри вăтам шкулта ĕçлеме пуçлаççĕ. Мал ĕмĕтлĕ вĕрентекенсене педагогсен ушкăнĕ те, ачасем те кăмăлпа йышăнаççĕ.
«Алли çыпăçать» теççĕ педагогсем пирки коллективра. Вĕсем иккĕшĕ те йывăçран тем те пĕр касса ăсталама, ÿкерме, сăрлама маттур. Ĕçре яланах пĕри теприне пулăшса пыраççĕ. Ачасем те вĕсен пултарулăхĕпе мухтанаççĕ, уроксене кăмăлпа çÿреççĕ. Ашшĕ-амăшĕн ăсталăхне кура вĕсен ачисем те, Александрапа Дмитрий, ал ĕçне хăнăхса ÿсеççĕ.
Ирина Евгеньевна ырă ят-сумлă педагог. Унăн ятне районта аван пĕлеççĕ. Учитель кăтартуллă уроксем те час-часах парать, ачасен, çемье ал ĕçĕсемпе тĕрлĕ конкурссене, куравсене хутшăнать. Шкулти, районти ытти учительсем унăн ĕçне пысăка хурса хаклаççĕ. Хăйĕн ĕçне чунтан парăннă учительшĕн вара вĕренекенĕсем конкурссенче малти вырăнсене йышăнни – чи пысăк парне, çакă унăн тăрăшулăхĕ сая кайманнине çирĕплетет. Акă, 2006 çулта унăн вĕренекенĕ, хĕрĕ Александра, Мускавра иртнĕ «Саламлă открытка» конкурсра лауреат ятне тивĕçнĕ. 2008 çулта 6 А класра вĕренекенсем, Анастасия Сятрайкинапа Кристина Хохлова, «Патшалăх символĕсем» конкурсра хăйсен ĕçĕсене хÿтĕлесе республикăра виççĕмĕш вырăн çĕнсе илме пултарнă. 2007 çулта хисеплĕ учителе район пуçлăхĕн А.И.Криковăн премине пама йышăннă. Çак парнепе учителе çамрăк ăрăва тивĕçлĕ воспитани парас ĕçре тăрăшулăхпа палăрнăшăн тав туса хавхалантарнă.
И.Е.Захарова 10 А класс ачисен ертÿçи. Ертÿçине кура вĕренекенсем те чăннипех хастар – вĕренÿре ĕлкĕреççĕ, шкул пурнăçне активлă хутшăнаççĕ. Валентина Улянды – ЧР Президенчĕн стипендиачĕ. Вăл – класс мухтавĕ. Класпа пĕрле Ирина Евгеньевна хăй те тĕрлĕ мероприятисене хастар хутшăнать. Кану каçĕсене ертсе пыма ялан тенĕ пекех ăна шанаççĕ. Пултарулăхĕ тĕрлĕ енлĕ педагогăн. Çавăнпа коллектив яваплă ĕçсене туса пыма ăна хушать. Сăпайлă, яваплăхран хăраман учитель ĕçе яланах тÿрĕ кăмăлпа пурнăçлать. Çемйипе те тăнăçлăхпа килĕшÿре пурăнаççĕ вĕсем: аслисем каланине ăша хываççĕ, ачисене лăпкăлăхра ÿстереççĕ. Çакă мар-и телей;