11 ноября 2008 г.
Ноябрĕн 8-мĕшĕнче районти ачасемпе çамрăксен спорт шкулĕнче ирĕклĕ майпа кĕрешессипе район пуçлăхĕн премине çĕнсе илессишĕн республикăри турнир иртнĕ. Пăхаттирсене район пуçлăхĕ А.И.Криков саламланă.
Спорт уявне хальхинче 8 команда килсе çитнĕ. Район пуçлăхĕн премине çĕнсе илессишĕн пурĕ 100 ытла спортсмен тупăшнă. Вĕсенчен ытларахăшĕ – шкул ачисем.
Сăмах май, паян ирĕклĕ майпа кĕрешессипе кăсăкланакансем чылаййăн. Районти çамрăк кĕрешÿçĕсем спорт шкулĕн секцинче П.А. Кузьмин тренер патĕнче ăсталăха туптаççĕ. Асăннă кун та кĕрешÿçĕсен пысăк ушкăнĕ район чысне тивĕçлĕ хÿтĕленĕ. Акă, хăйсен виçеллисем хушшинче Туктамăшри Николай Ефстифеевпа Александр Еклаков пĕрремĕш вырăна тухнă. Çавăн пекех Александрпа Дмитрий Ульяновсем те нумай очко пухса малти вырăнсене çĕнсе илнĕ. Калас пулать, çивĕч кĕрешÿре Шупашкар хулин тата Канаш районĕн пăхаттирĕсем те лайăх кăтартусемпе савăнтарнă.
Спортсменсен кĕрешĕвне сăнанă хыççăн район пуçлăхĕ çĕнтерÿçĕсене Хисеп грамотисемпе тата премисемпе чысланă. Чăваш Республикинчи ирĕклĕ майпа кĕрешессин Федерацийĕн представителĕсем турнира хутшăннă пăхаттирсен вăй-хăвачĕ, хастарлăхĕ пысăк пулнине палăртнă, халăх спорчĕ аталанса пынипе кăмăллă юлнă.
Палăртмалла, район территорийĕнче республика шайĕнчи ăмăртусем час-часах иртеççĕ. Ку района чыс кÿрет. Ноябрĕн 14-16-мĕшĕсенче спорт шкулĕнче шахматла выляссипе Чăваш Ен çурма финал чемпионачĕ иртмелле.