26 ноября 2008 г.
Районĕпе, ял хуçалăх, экономикăпа пурлăх тата çĕр хутшăнăвĕсен управленийĕнчен пĕлтернĕ тăрăх, хуçалăхсенчи кашни ĕне вăтамран 6,5 килограмм сĕт антарать. Пĕлтĕрхи çак тапхăрпа танлаштарсан, 100 грамм нумайрах. Пĕр пек условисенчех «Свобода» колхоз дояркисем кашни ĕнерен 10 килограмм сĕт сăваççĕ. Паянхи куна сăвăмпа вĕсем – чи малтисем. «Коминтерн» – 9,4, В.Никитин фермер хуçалăхĕ – 8,7, «Победа» – 8,5, «Нива» – 7,7, «Аккозинский» – 7,4. Асăннă хуçалăхсем выльăх-чĕрлĕхрен продукци илессине, иртнĕ çулхипе танлаштарсан, лайăхлатнă.
Çав хушăрах «Санкинский», «Мочковашский», «Путь Ильича» хуçалăхсенче продукци илесси чакса пырать. Хальхи вăхăтра çак хуçалăхсенче куллен кашни ĕне 2 килограмм чухлĕ сĕт антарать. Çакă апат рационĕ япăх пулнипе çыхăннă паллах. Акă, Шулю ферминче выльăх апачĕ çур хĕл валлилĕх çеç хатĕрленĕ. Кун пек кăтартусемпе сăвăма мĕнле ÿстермелле;
Хăш-пĕр хуçалăхсенче ăратлăха çĕнетессипе çителĕклĕ ĕçлемеççĕ. Çавна пулах «Асамат» хуçалăхри ĕнесем сĕт антармаççĕ. Районти хуçалăхсен витисене хĕле хатĕрлесе çитерессипе те тимлĕхе ÿстересчĕ.