03 декабря 2008 г.
Ноябрĕн 30-мĕшĕнче – Аннемĕр кунĕнче – Шупашкарта К. Иванов ячĕллĕ Чăваш патшалăх драма театрĕнче "Çулталăк çемйи-2008" республикăри конкурс иртнĕ. Финала тухма пултарнă 28 çемьене савăнăçлă лару-тăрура саламланă. Сăмах май, асăннă конкурс республикăра 2004 çултанпа çемьен обществăри хисепне çирĕплетес, çемьери ырă йăла-йĕркесене упраса хăварас тата аталантарса пырас тĕллевпе иртет.
Конкурса хутшăннисене Чăваш Республикин сывлăх сыхлавĕн тата социаллă аталану министрĕ Н.Суслонова саламланă, çĕнтерÿçĕ-çемьесене пысăк парнесем парса чысланă. Пирĕн районти Спиридоновсен çемйи "Социаллă яваплăха ăнланакан çемье" номинацире çĕнтернĕ. Палăртмалла, Николай Васильевичпа Ираида Владимировна Спиридоновсем районта иртнĕ "Çулталăк çемйи" конкурса хутшăнса çемье çинчен чи пуян альбом хатĕрлесе лауреат ятне илме тивĕç пулнă.
Спиридоновсен çемйине районта пурте тенĕ пекех пĕлеççĕ. Çемье тыткăчи Николай атте Хĕрлĕ Чутайри Крестовоздвижени чиркĕвĕнче ĕçлет, мăшăрĕ Ираида чиркÿре матушкăра тимлет, искусство шкулĕнче музыка предметне вĕрентет, "Сăваплă Руç" ансамбле ертсе пырать. Асăннă ансамбльпе тата "Мăкăньпи" пуканесен халăх театрĕпе Николай атте час-часах юсанмалли колонисене тухса çÿрет, шанăçа çухатнă çынсене пурнăç çине урăх куçпа пăхма вĕрентет. Çак ĕçре ăна мăшăрĕ тата тăватă ачи пулăшаççĕ.