13 декабря 2008 г.
Чăваш Енре тавçăруллă та ăста çамрăк çын хатĕрлесси çине пысăк тимлĕх уйăраççĕ. Хĕр упраçпа яш-кĕрĕме тĕрлĕ стипендисем пани вара малашне татах та тăрăшуллăрах пулма хистекен хăйне евĕрлĕ хавхалантару пулса тăрать. Акă, районти мал ĕмĕтлĕ вĕренекенсем çулсерен Чăваш Патшалăх Канашĕн депутачĕн, "Ядринмолоко" УАО-н генеральнăй директорĕн Н.В.Маловăн стипендине тивĕçни йăлана кĕчĕ ĕнтĕ. Юлашки çулсенче район пуçлăхĕ А.И.Криков та шкулта вĕренекенсене стипендипе хавхалантарать.
Шăпах декабрĕн 11-мĕшĕнче райадминистрацин ларусем ирттермелли Пысăк залĕнче вĕренÿре аван ĕлкĕрсе пыракан, тĕрлĕ олимпиадăсемпе конкурссене активлă хутшăнса палăрнă вĕренекенсене ятран паракан стипендипе савăнăçлă лару-тăрура чысларĕç. Николай Владимирович Маловпа Александр Иванович Криков вĕсене хаваспах стипендие тивĕçнине çирĕплетекен свидетельствăсене тата стипендисене алăран тыттарчĕç.
Районти шкулсенчи пурĕ 11 вĕренекен вĕренÿ çулĕ (кăçалхи сентябрĕн 1-мĕшĕнчен пуçласа 2009 çулхи май уйăхĕн 31-мĕшĕччен) хушшинче 500 тенкĕпе танлашакан Н.В.Маловăн стипендине илсе тăрĕ. Çак чыса тивĕçнĕ ачасене асăнмасăр иртме çук, вĕсем: Татьяна Жиганова, Татьяна Павлова, Алексей Ешмейкин (Атнар шкулĕ); Елена Полозина, Анна Чикмейкина (Мăн Этмен); Дарья Спиридонова, Эдуард Дадюков, Михаил Малышев (Хĕрлĕ Чутай); Александр Ионов, Евгений Сидоров (Çĕн Атикасси); Федор Железнов (Питĕркасси).
Çавăн пекех вĕрентÿпе воспитани ĕçне лайăх йĕркелесе, пĕрмаях çĕнетсе пыракан, пултаруллă, ăста, ăслă-тăнлă çамрăксем хатĕрлессишĕн ырми-канми тăрăшакан 5 учитель те Николай Владимирович премине илме тивĕçрĕ. Вĕсен шутĕнче: Атнар шкулĕн технологи учителĕ С.И.Кудряшов, Çĕн Атикасси шкулĕн математика вĕрентекенĕ А.В.Дерстуганова, Хĕрлĕ Чутай шкулĕнчен – Н.В.Мидакова (хими учителĕ), М.Н.Васильева тата В.Е.Иванова (чăваш чĕлхипе вĕрентекенсем).
Çак кунах район пуçлăхĕн стипендийĕсене тата премийĕсене тивĕçнисен ячĕсем те паллă пулчĕç. 100 тенкĕпе танлашакан стипендие уйăхсерен (кăçалхи сентябрĕн 1-мĕшĕнчен пуçласа 2009 çулхи май уйăхĕн 31-мĕшĕччен) районти 20 вĕренекен илсе тăрĕ. Вĕсем çаксем: Дмитрий Романов, Татьяна Фондеркина (Атнар шкулĕ); Андрей Апалеев, Екатерина Дмитриева, Жанна Огаринова (Мăн Этмен); Ксения Романова, Евгения Сятрайкина, Ольга Тимофеева (Хĕрлĕ Чутай); Лариса Кирикова, Петр Майоров, Надежда Петрейкина (Çĕн Атикасси); Юрий Вазин, Владислав Жуков (Питĕркасси); Денис Мухаров, Ольга Романова (Мишеркасси); Ирина Илларионова, Алена Пашкуртова (Хусанушкăнь); Марина Медакина, Надежда Рябикова (Шулю); Сергей Федотов (Штанаш). Палăртмалла, район пуçлăхĕн 5 пинпе танлашакан премине вара кăçал 10 вĕрентекен алла илчĕ: чăваш чĕлхипе литература учителĕ Л.А.Ешмейкина, пуçламăш классене вĕрентекен Л.Н.Мадебейкина (Атнар); акăлчан чĕлхин учителĕ Л.Н.Селянкина (Мăн Этмен); вырăс чĕлхипе литературине вĕрентекен Н.С.Абакумова, акăлчан чĕлхин учителĕ Г.Г.Горбунова, пуçламăш классене вĕрентекен Н.В.Хохлова (Хĕрлĕ Чутай); акăлчан чĕлхин учителĕ Л.С.Архипова, шкул директорĕн вĕрентÿпе воспитани енĕпе ĕçлекен çумĕ, математика учителĕ М.Ю.Вазина (Питĕркасси); географи предметне вĕрентекен А.А.Макарова, шкул директорĕн вĕрентÿпе воспитани енĕпе ĕçлекен çумĕ, чăваш чĕлхипе литература учителĕ М.А. Петрова (Хусанушкăнь).
Районти мĕн пур шкултан район пуçлăхĕн премине (50 пин тенкĕ) кăçал Хĕрлĕ Чутайри вăтам шкул тивĕçрĕ.
Ачасемпе учительсем, стипендиатсен ашшĕ-амăшĕсем ЧР Президентне Н.В.Федорова, район пуçлăхне А.И.Крикова, Чăваш Патшалăх Канашĕн депутатне, "Ядринмолоко" УАО-н генеральнăй директорне Н.В.Малова ачасене малашне те лайăх вĕренме, педагогсене творчествăлла та инновацилле ĕçлеме хавхалантарса пынăшăн чĕререн тав турĕç, вĕсен шанăçне тÿрре кăларма тăрăшасса сăмах пачĕç.
Савăнăçлă мероприяти районти ачасен искусство шкулĕнче вĕренекенсем илемлĕ юрăсем парнеленипе вĕçленчĕ.