17 декабря 2008 г.
Кăçалхи декабрĕн 14-мĕшĕнче Хĕрлĕ Чутайра шкул ачисем хушшинче баскетболла выляса районта мала тухассишĕн финалти вăйăсем иртрĕç.
Ачасен спорт шкулне пухăннă 12 команда – Хĕрлĕ Чутайри, Атнарти, Мăн Этменти вăтам, Штанашри, Тури Çĕрпÿкассинчи тата Хусанушкăнчи тĕп шкулсенче вĕренекенсем, зонăри вăйăра мала тухнисем, вăй виçрĕç. Çуллен ирттерекен турнир кăçал та ачасемшĕн чăн-чăн уяв пулса тăчĕ. Хĕрлĕ Чутайри 5-7 классенчи арçын ачасемпе хĕрачасем, 8-9 классенчи хĕрачасем çĕнтерÿçĕсен ятне тивĕçрĕç. Атнарти вăтам шкулта вĕренекен 8-9 классенчи арçын ачасене çитекенни никам та пулмарĕ.
Финалти вăйăсем вĕçленсен çĕнтерÿçĕ командăсене савăнăçлă лару-тăрура район администрацийĕн социаллă аталану пайĕн грамотисемпе наградăларĕç. Çавăн пекех вĕсене "Фемида" баскетбол командин тата Я.Хорайкин уйрăм предпринимателĕн пылак çимĕçĕсемпе сăйларĕç.
Ачасен спорт уявĕ пурин кăмăлне та кайрĕ. Çакă районта баскетбол вăййине ытларах сарма пулăшасса шанас килет.