24 декабря 2008 г.
Хĕрлĕ Чутай райповĕ республикăри потребкоопераци тытăмĕнче чи лайăх ята тивĕçлипе çĕнсе илнине паян нумайăшĕ аван ăнланать. Ку кăна-и; Пирĕн суту-илÿ ăстисем Раççейри ăмăртура та темиçе хут та çĕнтерчĕç. Ĕçри çитĕнÿсемшĕн коллектив çулленех Хисеп грамотисемпе хаклă парнесем çĕнсе илет. Ÿсĕмсем, паллах, райпо Канашĕн ертÿçин Александр Юрьевич Степановăн пуçарулăхĕпе тата пултарулăхĕпе тачă çыхăннă.
Районти потребительсен обществи темиçе предприятие пĕрлештерсе тăрать. Унăн тĕллевĕ – халăха кирлĕ таварпа куллен тивĕçтересси, тĕрлĕ чĕр таварпа усă курса суту-илÿ валли çурма фабрикатсем, çăкăр-булка изделийĕсем, кăлпасси, сĕткенсем, çынсене тÿлевлĕ пулăшу парасси тата ытти те. Кăçалхи 11 уйăхра "Красночетайское" ТЯО 826 тонна çăкăр, 125,5 тонна булка изделийĕсем, 37,5 тонна тĕрлĕ макарон, çавăн пекех 888,9 тонна çурма фабрикатсем туса кăларнă. Халăха вара 910 пин тенкĕлĕх тÿлевлĕ пулăшупа тивĕçтернĕ.
– Суту-илÿ ĕçĕнче нумай çул тăрăшни мана коллектива çĕнĕ чикĕсене çĕнсе илме хавхалантарма пулăшать, – каласа парать Александр Юрьевич. – Кирек епле çитĕнĕве те пĕччен тума çук. Коллектив ăнăçлă тата тухăçлă ĕçлени, яваплăха туйни кирлĕ. Çакăн пек пахалăхсем нумай ĕçченĕн пур. Çамрăксене аслисем вĕрентсе пыраççĕ.
Райпо кăçал лавккасене юсама, автомашинăсемпе холодильник туянма 3000,0 пин тенкĕ тăкакланă. Çавăн пекех "Четайское" тата "Янтарь" ТЯО-сем кăçал тĕрлĕ оборудовани туяннă, çурт-йĕре çĕнетнĕ. Ку енĕпе те укçа-тенкĕ чылай тухса кайнă. Юлашки çулсенче район центрĕнчи "Гастроном", "Универмаг", "Ял хуçалăх продукчĕсем", "Вĕри çăкăр" лавккасене тĕпрен юсанă. Вĕсем халĕ хуларинчен пĕрре те кая мар. Тавар туянакансем çĕнĕлле ĕçлекен лавккасене йышлăн çÿреççĕ. Хăш-пĕр магазинсен ĕçĕсене самообслуживани мелĕпе йĕркелени уйрăмах ăнăçлăх кÿрет.
...Туканаш ялĕ пысăк, урамĕсем вăрăм. Кунта 220 кил ытла, 291 çын пурăнать. Вĕсенчен нумайăшĕ ялти лавккапа тачă çыхăну тытать темелле. Мĕншĕн тесен халăх магазинтан ĕç вăхăтĕнче пĕр самантлăха та татăлмасть. Римма Ивановна Кудюкова заведующи ертсе пынипе Елена Яковлевна Батаева сутуçă кашнин кăмăлне туллин тивĕçтерме тăрăшаççĕ. Çынсем кунта апат-çимĕç продукчĕсем туянма ытларах çÿреççĕ. Пурте тулли кăмăлпа тухса каяççĕ лавккаран. Суту-илÿ ăстисем хăйсен ĕçне аван пĕлеççĕ, çынна мĕн кирлине хăвăрт тупса параççĕ. Çакăншăн халăх Р.Кудюковапа Е.Батаевана хисеплет, сума савать.
Çакă паха – кăçал магазин çуртне çĕнетсе илемлетнĕ. Унта кĕрсе тухма кăмăллă. Хитре çурт ял çыннисене хăй патне йыхăратех ĕнтĕ.
– Лавккара ялти халăха кирлĕ тавар çителĕклех, – тет Римма Ивановна. – Апат-çимĕç, хуçалăхра кирлĕ ытти тавар сентресем çинче туллиех. Пирĕншĕн кунти ĕç условийĕсем питĕ лайăх, çакăншăн чун савăнать.
Сăмах май, Туканашри лавкка кăçалхи 11 уйăхра халăха 2 млн. 221 пин тенкĕлĕх тавар сутнă. Р.Кудюковапа Р.Батаева сутуçăсем кăçалхи декабрĕн 8-мĕшĕнчен пуçласа 2009 çул шучĕпе ĕçлеме тытăннă. Вĕсем – райпо коллективĕнче чи хастаррисен ретĕнче.