27 декабря 2008 г.
Хĕрлĕ Чутайри культурăпа кану центрĕнче паян хĕрÿ ĕç вăхăчĕ. Çĕнĕ çул уявĕ умĕнхи тулли пурнăç таппи теме пулать кунти лару-тăрăва. Акă, çурт умĕнчи пысăк та капăр чăрăш каçсерен хăйĕн çутипе ялкăшса ларнине куратăн. Ытти илемлĕх те чуна тыткăнлать. Пÿлĕмсенче вара юрă-кĕвĕ янăрать, пултарулăх ăстисем репетици ирттереççĕ.
– Кашни уяв хăйне евĕрлĕхĕпе пурин асĕнче те юлтăр тетпĕр, – калаçăва пуçарчĕ культурăпа кану центрĕн директорĕ Алексей Магаськин. – Çĕнĕ çул валли те ятарлă программа хатĕрлерĕмĕр, ăна тивĕçлипе пурнăçа кĕртессишĕн тăрăшатпăр. Кĕскен калас пулсан, центр специалисчĕсем çĕнĕлле ĕçлессине тĕп вырăна хураççĕ.
Çапла тума пурнăç хушать. Чăваш Республикин Президенчĕ Н.Федоров ялти клуб учрежденийĕсене модернизацилесси çинчен Указ кăларнăранпа кĕçех çулталăк çитет. Унпа килĕшÿллĕн культура ĕçченĕсем умне ял çыннисен канăвне усăллă йĕркелес, вĕсен тавра курăмне, информаци шайне ÿстерес задачăсем тухса тăчĕç. 2008-2010 çулсенче ку енĕпе чылай ĕçсем туса ирттерме палăртнă. Чи малтанах çурт-йĕре çĕнетсе илемлетес ыйтăва татса памалла. Центр вырнаçнă çурт тăррине металлочерепица витме район бюджетĕнчен виçĕ миллион тенкĕ ытла тухса кайнă. Пĕтĕм ĕçе пурнăçлаканĕ – конкурсра çĕнтернĕ «Ядринагропромстрой» общество. Унăн ĕçченĕсем çу кунĕсенче строительство ĕçĕнче пысăк хастарлăх кăтартнине палăртма кăмăллă. Вĕсемех çурт фасадне ку чухнехи дизайнпа илемлетнĕ.
– Куçса çÿрекен культура учрежденийĕ тăтăшах ял çыннисем патне тухса çÿрет, – терĕ центрăн илемлĕх ертÿçи Роберт Галимов. – Акă, кăçал кĕркуннехи тапхăрта коллектив Серенкасси, Туктамăш, Иккĕмĕш Хурашаш, Тури Çĕрпÿкасси ялĕсенче, Березовкăри вăхăтлăх пурăнмалли ваттисен çуртĕнче пулса халăха юрă-ташăпа савăнтарчĕ. Çынсем Эльвира Федоровапа Тамара Иванова ертсе пыракан ушкăн пултарулăхне тăвăллăн алă çупса хаклаççĕ.
Ветерансен халăх хорĕ те ăсталăхĕпе çÿллĕ шая çитнине палăртма кăмăллă. Унăн хормейстерĕ Галина Матюшкинапа концертмейстерĕ Василий Романов – ăста специалистсем. Вĕсем пултарулăх ĕçне ялти çынсене явăçтарас тĕлĕшпе хастарлăх кăтартаççĕ. Нумаях пулмасть хор Туктамăшри Культура çурчĕн тата Хĕрлĕ Чутайри культурăпа кану центрĕн сцени çине тухнă, пухăннисене концерт кăтартнă.
– Эпир республикăри пултарулăх конкурсне хутшăнса 580 пин тенкĕ çĕнсе илтĕмĕр, – терĕ Алексей Магаськин малалла. – Ку пире çĕнĕлĕхе çул хывма вăй-хал парать. Центр специалисчĕсем тĕслĕх культура учрежденийĕн ĕçне йĕркелес енĕпе Раççейре палăрнă Белгород облаçĕн опытне тĕплĕн вĕренеççĕ.
Чăваш Республикин Культура министерствипе Халăх пултарулăх çурчĕн ĕçченĕсем те районти центрта час-часах пулаççĕ, çĕнĕлĕхсемпе паллаштараççĕ. Вĕренÿ ĕçре ÿсĕмсем тума пулăшать.
Республика хĕрлĕчутайсене çĕнĕ йышши çутă, сасă тата акустика хатĕрĕсем уйăрса панă. Темиçе тĕрлĕ костюмпа ытти тум комплектне илсе килмелле пулать. Компьютер пур-ха, оргтехника татах ярса парĕç. Специалистсем унпа ĕçлеме хăнăхаççĕ.
Пĕтĕмĕшле илсен, халăх хушшине культурăна саракансен пĕр тĕллев – тĕслĕх культура учрежденийĕн ятне çĕнсе илсе ĕç çыннисен канăвне усăллă йĕркелесси, вĕсене юрă-ташăпа савăнтарасси.