24 января 2009 г.
Районти шкулсем 2006 çултанпа "Вĕрентÿ" приоритетлă наци проектне пурнăçа кĕртес тĕлĕшпе ĕçлеççĕ. Ку тапхăрта çамрăк ăрăва тарăн пĕлÿÿ, тивĕçлĕ воспитани парас енĕпе чылай ыйтăва татса панă. Çакă нумай çĕрте ырă улшăнусем тата çĕнĕ çитĕнÿсем тума пулăшнă.
Приоритетлă наци проекчĕн тĕллевĕ – инновациллĕ вĕренÿ программине ĕçе кĕртсе пыракан пĕтĕмĕшле пĕлÿ паракан учрежденисене укçа-тенкĕпе пулăшасси, лайăх учительсене хавхалантарасси, талантлă çамрăксене патшалăх пулăшăвĕпе тивĕçтересси. Çакăн пек çул-йĕр тытса пыракан коллективсемпе уйрăм вĕрентекенсем сахал мар районта. Вĕсен ĕçĕ чăннипех те курăмлă. Çавна май нумайăшĕ хăйсен пултарулăхне çуллен ÿстерессишĕн, конкурссене хутшăнса çитĕнÿсем тăвассишĕн ăс-тăна та, вăй-хала та шеллемеççĕ.
2006 çулта Раççей Федерацийĕн Президенчĕн 1 млн. тенкĕлĕх грантне çĕнсе илессишĕн районти виçĕ шкул – Хĕрлĕ Чутайри, Мăн Этменти тата Атнарти вăтам шкулсем конкурса хутшăнчĕç. 2007 çулта вара Мишеркасси шкулĕсĕр пуçне ытти пур вăтам шкул та конкурсра тупăшрĕç. 2008 çулта РФ Президенчĕн грантне илессишĕн Çĕн Атикассинчи тата Питĕркассинчи вăтам шкулсем кĕрешĕве тухрĕç.
Уйрăм учительсем хăйсен пĕлĕвĕпе ăс-хакăлне кăтартас тĕлĕшпе çине тăрса ĕçленине палăртма та кăмăллă. Акă, РФ Президенчĕн 100 пин тенкĕлĕх грантне çĕнсе илессишĕн 2006 çулта 6 вĕрентекен, 2007 çулта – 12, 2008 çулта 20 вĕрентекен тупăшрĕ. Çав йышран 5 учитель педагогика ăсталăхне тата вĕрентĕве пысăк тÿпе хывса çĕнтерÿçĕ ятне илме тивĕçрĕ. Хĕрлĕ Чутайри вăтам шкулти биологи вĕрентекенĕ Елена Николаевна Орлова (2006ç.), ку шкулти Эдуард Васильевич Романов ОБЖ учителĕ (2006ç.), Тралькассинчи тĕп шкулти чăваш чĕлхипе литература учителĕ Надежда Васильевна Ермакова (2008ç.), Мăн Этменти вăтам шкулти вырăс чĕлхипе литература вĕрентекенĕ Зинаида Григорьевна Полозина (2007ç.), ку шкулти Николай Иванович Полозин историк (2008ç.) 100-шер пин тенкĕ çĕнсе илме пултарчĕç. Çавăн пекех 2007 çулта Н.Ермакова Чăваш Республикин Президенчĕн 10 пин тенкĕлĕх грантне тивĕçрĕ.
Инновациллĕ вĕрентÿ технологийĕсене пурнăçа кĕртсе пыракан шкулсене, чи лайăх учительсене хавхалантарма, «Вĕрентÿ» наци проекчĕпе килĕшÿллĕн, район пуçлăхĕн премийĕсене туса хунă. Виçĕм çул Питĕркассинчи вăтам шкул коллективĕ (директорĕ Анатолий Михайлович Ейков) çак премие çĕнсе илчĕ. Ку, паллах, мĕн пур вĕрентекене малашне тата тăрăшарах ĕçлеме хавхалантарчĕ. Çавăн пекех районти вунă учитель 5-шер пин тенкĕ премие тивĕçрĕç. Çакна та палăртса хăвармалла. Районти 20 вĕренекене çуллен вĕренÿре пысăк çитĕнÿсем тунăшăн район пуçлăхĕн стипендине парса тăраççĕ.
Учительсене укçа-тенкĕпе хавхалантарни вĕсен ĕçлес хастарлăхĕпе пултарулăхне ÿстерет. Вăтам шкул пĕтерекенсем ятарлă вăтам тата аслă шкулсене вĕренме кĕни çакна яр-уççăн çирĕплетсе парать. Тĕслĕхрен, Чăваш Республикин Патшалăх Канашĕн депутачĕ, «Ядринмолоко» уçă акционер обществин генеральнăй директорĕ Н.В.Малов уйăрнă 1-шер пин тенкĕне пилĕк учитель, 500-шер тенкĕне вунă вĕренекен илсе тăраççĕ. ЧР Президенчĕ Н.В.Федоров уйрăмах пултарулăхпа палăрнă икĕ çамрăка ятарлă стипенди тÿлесе тăнă. Вĕсем – Лариса Петрова (Çĕн Атикассинчи вăтам шкул) тата Валентина Ульянды (Хĕрлĕ Чутайри вăтам шкул).
Шкул çулне çитмен ачасен учрежденийĕсенче ĕçлекенсем те çулленех тĕрлĕ конкурссене хутшăнаççĕ. Пĕлтĕр «Пилеш» ача сачĕн коллективĕ Чăваш Республикин Президенчĕн 200 пин тенкĕлĕх грантне илме тивĕç пулчĕ.
Вĕрентÿ ĕçĕ пĕртте çăмăл мар. Çакна шута илсе çĕршыв, республика тата район бюджечĕсенчен педагогика коллективĕсене, уйрăм учительсене хавхалантарма укçа-тенкĕ уйăраççĕ. Ку вĕрентĕве лайăхлатса пыма, çĕршыва кирлĕ граждансем хатĕрлеме, кашни ача çитĕнсен хăйĕн вырăнне туптăр тесе тăрăшма шанчăк çуратать.