04 февраля 2009 г.
Район пуçлăхĕн А.И.Криковăн йышăнăвĕпе 2009 çула Чечексен çулталăкĕ тесе палăртнă. Унăн тĕллевĕ ялсен, урамсен, картишсен, социаллă-культурăллă, ял хуçалăх, йăла объекчĕсен экологи, санитари, гигиена, эстетика лару-тăрăвне лайăхлатасси.
Паянхи кун ялта пурăнакансенчен чылайăшĕ хăйсен участокĕсенче чечек клумбисем йĕркелеме тăрăшни сисĕнет. Илемлĕх тата ырă шăршă пирĕн чун-чĕрере канăçлăх çуратать, стреса сирме пулăшать, пурăнма вăй-хал парать. Çу кунĕсенче лайăх клумбăсем ăсталама «Ял тăрăхĕсем хушшинчи тĕп библиотека» муниципаллă культура учрежденийĕн информаци центрĕнче йĕркеленĕ «Чечексен патшалăхĕ» курав пулăшасса шанас килет.
Кунти «Пÿлĕмри савăнăç» пайра пÿлĕмри ÿсен-тăрансене çитĕнтерме, пăхса тăма тата ĕрчетме вĕрентекен литературăпа, çавăн пекех вĕсене удобренисемпе апатлантарас тĕлĕшпе панă хăш-пĕр вăрттăнлăхсемпе паллашма пулать.
«Тĕлĕнтермĕш сад» пайра вара çут çанталăк ландшафчĕпе килĕшÿллĕн клумбăсем ăсталасси, лартса хăварма кирлĕ чечексем тупасси, газонсене тирпейлесси çинчен çырнă кĕнекесене вырнаçтарнă. Кунтах тĕрлĕ тĕмсене тата курăк йышши ÿсен-тăрансене курма пулать.
«Чечексен астрологийĕ» пайра кашни çыннăн чечек гороскопĕ çинчен çырса кăтартни пур. Астрологи кашни ÿсен-тăрана зодиак паллипе çыхăнтарать, флора тĕнчин кашни представительне хăйне майлă пахалăхпа тата сыватакан майсемпе тивĕçтерет.
Пĕтĕмĕшле илсен, «Чечексен тĕнчи» курав кил хуçи хĕрарăмĕсене пысăк пулăшу парасса шанас килет.