04 февраля 2009 г.
Кашни çын пурнăçра хăй кăмăлланă профессие суйласа илет те ĕмĕр тăршшĕпе юратнă ĕçре тăрăшать. Кив Ирчемеспе Хăмаркка ĕне ферминче те ĕçе чунпа парăннă çынсем тăрăшаççĕ. Акă, фермăра тăрăшакансем сĕт сăвассипе, аш-какай хатĕрлессипе ăнăçлă ĕçлеççĕ. Хуçалăхăн мăйракаллă шултра выльăхсем 160 пуçа яхăн, вĕсенчен сумалли ĕнесем 65 пуç шутланаççĕ. Иртнĕ çул кунта ĕне выльăх шутне кăшт ÿстерме пултарнă, лашасем те тытаççĕ, вĕсем 5 пуç.
Февралĕн 3-мĕшĕ тĕлне кунти дояркăсем пĕр ĕнерен талăкра 7 килограмм сĕт сăваççĕ. Сăмах май, виçĕм çул хуçалăхра ĕне сăвассине çĕнĕ технологипе йĕркеленĕ. Çавна пулах ĕнтĕ выльăх-чĕрлĕхрен продукци илесси лайăхланнă, сĕт те лайăх хакпа сутăнать.
Пăру пăхакансен ĕçĕ те курăмлă. Самăртма хупнă выльăхсем 540 грама яхăн ÿт хушаççĕ.
Хуçалăх производствине аталантарас ĕçре тăрăшакансене палăртас килет. Акă, Алексеевсен çемйинех илер. Çемье пуçлăхĕ – Петр Михайлович, чылай çул фермăра ĕçлет. Кунти пур енлĕ специалист теççĕ ун пирки. Вăл выльăх-чĕрлĕх валли тырă авăртать, çав хушăрах сантехник ĕçĕсене пурнăçлать, витерен тислĕк кăларса тăрасси те ун çинчех тăрать. Мăшăрĕ, Елена Аркадьевна, дояркăра 35 çул вăй хурать. Вĕсен тĕслĕхне кура Наташа хĕрĕ те ферма ĕçне кÿлĕннĕ. Çавăн пекех Л.М.Кирикова та дояркăра 1992 çултанпа тăрăшать.