Публикации » Конкурссенче çĕнтерÿçĕ ята тивĕçрĕмĕр

2008 çул та вĕçленчĕ, 2009 çулăн пĕрремĕш уйăхĕн юлашки эрнине кĕтĕмĕр. Çавна май, иртнĕ çулталăка пĕтĕмлетмелли вăхăт та çитрĕ. «Пирĕн пурнăç» хаçат редакцишĕн 2008 çул ăнăçлă çул пулчĕ тесен те юрать. Коллектив хăйĕн умне лартнă тĕллевсене пĕтĕмпех пурнăçа кĕртрĕ тесен те йăнăш мар. Çулран çул хаçат тиражĕ ÿссе пыни те пирĕншĕн пысăк кăтарту, кăçал вăл пĕлтĕрхинчен 100 экземпляра яхăн ÿсрĕ. Çавăн пекех республикăри массăллă информаци хатĕрĕсем хушшинче иртекен тĕрлĕ конкурссене хутшăнса çĕнтерÿçĕ ята та тивĕçрĕмĕр. Кун пирки вара иртнĕ эрне кун, январĕн 23-мĕшĕнче, ЧР Культура министерствипе Журналистсен союзĕ Раççей тата Чăваш пичет кунĕ ячĕпе ирттернĕ уяври самантсем те çирĕплетсе параççĕ. Палăртма кăмăллă, чи малтан уявра Чăваш Республикин Культура министрĕ Р.М.Лизакова çĕнĕшупашкарсемпе, çĕмĕрлесемпе пĕрле пире, «Пирĕн пурнăç» хаçат редакцине, Диплом парса саламларĕ. Мĕншĕн-ха? Иртнĕ çул Чăваш Енре Ырă ĕçсен çулталăкĕ пулчĕ. Çакăн пирки тата районти ырă ĕçсем çинчен район хаçат редакцийĕ тăтăшах вулакана пĕлтерсех тăчĕ. Редакци коллективĕн хаçатсăр пуçне хăйĕн сайчĕ те пур, унăн адресĕ: http:/www.gov.cap.ru/main.asp?govid=599. Хаçат страницинчи материалсем сайтра та вырăн тупаççĕ. Шăпах, район хаçат редакцийĕ сайтри «Ырă ĕçсен çулталăкĕ» баннера тивĕçлĕ шайра йĕркеленĕшĕн виççĕмĕш вырăна тивĕçрĕ.

Уявăн малаллахи пайĕнче вара хаçат редакцийĕ суту-илĕве халалланă материалсемпе конкурса малти вырăнсене çĕнсе илнĕшĕн Чăвашпотребсоюзăн Хисеп грамотипе парнине тивĕçрĕ.

Унтан Раççей сбербанкĕн Чăваш Енри филиалĕн парнине вара район хаçачĕн редакторĕ А.Оринова «Ĕçлĕ калем перо» конкурсра «Уçăмлă сăмах» номинацире çĕнтерÿçĕ ята тивĕçрĕ.

Çавăн пекех, хаçатăн пĕлтĕрхи номерĕсенче пĕлтернĕччĕ, Чăваш Республикин Культура министерстви республикăри информаци хатĕрĕсем хушшинче пĕрремĕш хут ирттернĕ конкурса хутшăнса 100 пин тенкĕлĕх грант илме те тивĕç пултăмăр.