07 февраля 2009 г.
2008 çулта çул çитменнисем преступлени тăвасси чакнă. Вĕсем 12 уйăхра 10 преступлени тунă, виçĕм çул 17 хутчен йĕркене пăснине шута илнĕ.
Райадминистрацин çул çитменнисемпе ĕçлекен комисси районти йывăр лару-тăрăва кĕрсе ÿкнĕ, хÿтлĕхсĕр е иртĕхнĕ ачасене шута илсе тăрать, вĕсене тĕрĕс çул çине тăма пулăшать. Çамрăксем ытларах каçхи вăхăтра çапкаланса çÿренине шута илсе, комисси членĕсем милици сотрудникĕсемпе каçхи рейдсене тухаççĕ. Кунта ашшĕ-амăшĕн патрульне йĕркелени те пĕлтерĕшлĕ. Уйăхсерен Профилактика кунĕсенче йĕркесĕр çемьесене çитсе калаçусем ирттерни право йĕркине пăсассинчен самаях хăтарать. Çавăн пекех шкул ачисемпе, ашшĕ-амăшĕсемпе алкоголь тата пирус туртнин, наркотик сиенĕсем çинчен калаçусем час-часах йĕркеленĕ. Çакăн пек профилактикăлла ĕçсене тĕллевлĕ пурнăçласа пынăран çул çитменнисем хушшинче йĕркесĕрлĕх чакнă.
Ачасен воспитанийĕпе тивĕçлĕ ĕçлеймен, вĕсен вĕренĕвне асăрхаса тăрайман çемьесем уйрăм учетра тăраççĕ. Çакăн пек 55 çемьене (вĕсенче 107 ача) регистрациленĕ. Çак список çĕнелсе-улшăнса тăрать. 12 уйăхра 24 çемьене (тĕрĕс çул çине тăнисене, ачисем çула çитнипе, çемьесем пурăнмалли вырăна улăштарнипе) учетран кăларнă, унтан 14 çемьене учета илнĕ. Çав тапхăрта 11 çынна ашшĕ-амăшĕн прависĕр хăварнă. Палăртмалла, вĕсем ачисем çине алă сулнисем, ĕçкĕпе аташакансем. Иртнĕ çулта çул çитменнисемпе ĕçлекен комисси членĕсем ун пек 79 çемьене çитнĕ, вĕсене право йĕркине пăснăшăн, ачасен воспитанийĕпе тивĕçлĕ ĕçлеменшĕн çирĕп асăрхаттарнă.
Район территорийĕнче ашшĕ-амăшĕ пур çĕртех тăлăх ачасене шута илнĕ. 2008 çулта 8 ачана опекăна панă, 1 ачана интерната вырнаçтарнă тата 1 ачана лайăх çемье хăй хÿттине илнĕ. Сăмах май, паянхи куна районĕпе 35 çемье ют ачасене хăйсен йышне илнĕ, опекун çемьесем – 69.
Ашшĕ-амăшĕсем эрехпе сăйланма юратаççĕ тетпĕр те, çул çитменнисем те тиркеменни палăрать. 2008 çулта обществăлла вырăнта ÿсĕрле çÿренĕ çул çитмен 6 çамрăка тытса чарнă, учета илнĕ, вĕсенчен пĕрине – «Момент» клей шăршлама юратнăшăн.
Çул çитмен çамрăксем хушшинче вĕренÿ занятийĕсене сиктерекенсем пулнă. 12 уйăхра Çĕмĕрлери 6-мĕш номерлĕ професси училищинчен 25 заявлени пулнă. Дирекци районтан вĕренме çÿрекенсем уроксене час-часах сиктерни пирки пĕлтернĕ. Комисси ларăвĕнче çак ачасен дисциплинине пăхса тухнă, ашшĕ-амăшĕсемпе, учительсемпе тĕл пулса калаçнă, 20 çамрăка вĕренÿ учрежденине каялла вырнаçтарнă, 2-шне çав-çавах училищĕрен кăларса ямалла тунă.
Çуллахи тапхăрта усăсăр çапкаланса çÿресрен халăха ĕçпе тивĕçтерекен центр урлă 137 çамрăка вăхăтлăх ĕç вырăнĕ тупса панă, вăй-хала çирĕплетме спорт мероприятийĕсене тата ытти ырă ĕçсене явăçтарнă.
Çитĕнекен ăрăва тÿрĕ çул çине тăма пулăшассишĕн кашни тăрăшар.