28 февраля 2009 г.
Чăваш Ен Президенчĕ Н.Федоров Министрсен Кабинечĕн членĕсемпе тата федераци ведомствисен республикăри органĕсен ертÿçисемпе ирттернĕ канашлура çакна палăртнă: «Раççей Федерацийĕн Правительствин председателĕн çумĕ А.Жуков Мускавра ирттернĕ канашлура пирĕн республикăра ĕçсĕр çынсене хушма пулăшу кÿмелли тĕллевлĕ программине ырланă. Программăна пурнăçлама 526 млн. та 320 пин тенкĕ кайĕ. Çапла майпа Чăваш Енре пурăнакан 3,5 пин çынна професси пĕлĕвĕ пама 32 млн. та 670 пин тенкĕ, çынсене хăйсем тĕллĕн вĕренсе ĕç тупма 6 млн.та 165 пин, 29 пин çын валли, çав шута пĕлÿ паракан учрежденисенчен вĕренсе тухакан 4 пин çамрăк та кĕрет, вăхăтлăх ĕç вырăнĕ хатĕрлеме – 476 млн. та 485 пин тенкĕ уйăраççĕ. Унсăр пуçне кăçал инвестици проекчĕсене пурнăçласа 5,6 пин çĕнĕ ĕç вырăнĕ йĕркелĕç.
«Асăннă программăпа килĕшÿллĕн организацисенче рабочи кадрĕсене упраса хăварма çеç мар, вĕсен квалификаци шайне ÿстерме тата пĕчĕк бизнеса кирлĕ таран аталантарма та май килĕ», – палăртнă Президент.
Министрсен Кабинечĕн председателĕн çумĕ – сывлăх сыхлавĕпе социаллă аталану министрĕ Н.Суслонова республикăри заводсенче, сăмахран, нимĕçсемпе калаçса килĕшсе, паха протезсем хатĕрлекен предприяти уçма план пурри çинчен пĕлтернĕ.
«Ку плана хăвăртрах пурнăçа кĕртмелле. Пысăк технологиллĕ протезсен предприятийĕ шутсăр кирлĕ», – тенĕ Н.Федоров.
ЧР ПА пресс-служби.