11 марта 2009 г.
Çын пурнăçĕ ĕçпе кануран йĕркеленсе пырать. Шкул ачисен пурнăçĕ те çавăн пекех ылмашăнать: малтан ачасем уроксенче пĕлĕве ÿстереççĕ, хыççăн – тĕрлĕ кружок-секцисенче, кану каçĕсенче. Хĕрлĕ Чутай вăтам шкулĕнче те пурнăç çăл куç пек тапса вĕресе тăрать. Кашни кун тенĕ пекех мĕн те пулин çĕнни пулать. Акă, февралĕн 26-мĕшĕнче уроксем хыççăн акт залĕнче Шупашкарти хăнасем, Чăваш патшалăх юрăпа ташă ансамблĕ концертпа савăнтарчĕç. Мĕн тери хаваслă та пуян программа хатĕрленĕ артистсем! Республикипе паллă ушкăнăн пултарулăхĕпе паллашма питех те кăмăллă пулчĕ. Ушкăн хăйĕн ăсталăхĕпе тĕрлĕ çĕршыва та тухса çÿрет. Шкул ачисем, педагогсем артистсен кашни номерне тăвăллăн алă çупса йышăнчĕç, вĕсене хавхалантарса пычĕç. Людмила Семенова, Василий Яковлев, Василий Раймов, Алина Максимова шăрантарнă юрăсем кашнине тыткăнларĕç. Вĕсем юрăсенче çĕр ĕçченĕсене мухтарĕç, тăванлăхпа туслăха ырларĕç, ташă ушкăнĕ ĕлĕкхи чăвашсен ташшисене тĕпĕртеттерчĕ. Куракансем юрă-ташă кĕввин асамлăхĕпе паллашнă май, чăваш халăх çи-пуçне курса киленчĕç. Алина Максимова юрăç Штанаш ялĕнчен пулнине пĕлтерсен залра ларакансем унăн юррисене татах та кăмăллăрах йышăнчĕç.
Концерта ташă ушкăнĕ вĕçлерĕ. Вĕсен çаврăнăçуллă, илемлĕ ташшисене вĕренекенсем нумайлăха асра тытĕç.
Концерт вĕçĕнче Людмила Семенова сăмах илчĕ, Чăваш патшалăх юрăпа ташă ансамблĕ Мăн кун иртсен Шупашкарта пысăк программăпа халăха савăнтарассине каларĕ, хĕрлĕчутайсене театра çÿреме йыхравларĕ.