14 марта 2009 г.
Кив Атикасси ял тăрăхĕн смотр-отчечĕ мартăн 10-мĕшĕнче Çĕн Атикасси шкулĕнчи акт залĕнче иртнĕ. Смотр-отчета хатĕрленсе киватикассисем вырăнти ал ăстисен куравне йĕркеленĕ. Пухăннисем И. Смирнова (Çĕн Атикасси), В.Чумакова (Кив Атикасси) çыхнă тата тĕрленĕ япаласемпе, шкулта технологи предметне вĕрентекен В.Соловьевăн йывăçран касса ăсталанă савăт-саписемпе паллашнă. Çавăн пекех халăх А.Алексеева педагог йĕркелесе пыракан музейра пулнă.
Йăлана кĕнĕ йĕркепе пухăннисем Кив Атикасси ял тăрăхĕн ĕçĕ-хĕлĕ çинчен доклад итленĕ. Кăçал отчета ял тăрăхĕн пуçлăхĕн çумĕ Р.Улянды туса панă. Раиса Васильевна хăйĕн сăмахĕнче юлашки тапхăрта йышăннă саккунсем çинче чарăнса тăнă, ял çыннисен пурнăçне лайăхлатмалли мелсене асăннă, 2009 çулта пурнăçламалли ĕçсемпе паллаштарнă.
Шкул директорĕ В. Ядранская вĕрентÿ тытăмĕнчи лару-тăру çинчен калаçнă.
Пухăннисем «Свобода» колхоз председателĕн В.Бромбинăн калаçăвне тимлесе итленĕ. Умра çур аки-çке. Ертÿçĕ яваплă тапхăра мĕнле хатĕрленсе ирттересси çинчен сăмах пуçарнă, ял çыннисене çĕр ĕçне хастар хутшăнма чĕнсе каланă.
Смотр-отчетăн малалли пайне пултарулăх ушкăнĕ тăснă. Куракансем юрă-ташă, шÿт ăстисен концерчĕпе кăмăллă юлнă.