21 марта 2009 г.
Район пуçлăхĕ А.Криков 2009 çула Чечексен çулталăкĕ тесе палăртрĕ. Тĕллевĕ – ялсене, урамсене, социаллă-культурăллă вырăнсене, йăла объекчĕсем тавра тирпей-илем кÿресси, тавралăха симĕслетесси, чечексем лартасси.
"Чăваш Енре 2009 çула Çĕр ĕçченĕн çулталăкĕ, районта вара Чечексен çулĕ тесе йышăнни питĕ вырăнлă, вĕсем пĕр-пĕринпе тачă çыхăнса тăраççĕ», – тесе пуçларĕ мартăн 16-мĕшĕнче иртнĕ канашлура хăйĕн сăмахне район пуçлăхĕн çумĕ, райадминистрацин обществăлла инфратытăм аталанăвĕн тата пурăнмалли кил-çуртпа коммуналлă хуçалăх пайĕн начальникĕ И.Л.Хораськин. Çавна май Чечексен çулталăкне ирттерес тĕлĕшпе комисси туса хунине пĕлтерчĕ.
Сăмах май, ял тăрăхĕсенче, предприяти-организацисенче ку енĕпе ĕçлеме пуçланă ĕнтĕ: шкулсенче чечек калчисем хатĕрлеççĕ, ытти çĕрте план-проектсем тăваççĕ. Палăртмалла, Иван Лаврентьевич илемлĕх тĕлĕшпе ĕçлемелли хатĕр проектсене апрелĕн 1-мĕшĕччен райадминистрацине тăратмаллине каларĕ.
Райадминистрацин архитекторĕ А.В.Секайкин районта Чечексен çулталăкĕ икĕ тапхăрпа – малтан ял тăрăхĕсенче, унтан район шайĕнче – иртессине палăртрĕ. Ял тăрăхĕсенче, район центрĕнче те чечек лартса ÿстернĕ "Чи лайăх кил-çурт", "Чи илемлĕ урам", Чи тирпейлĕ предприяти-организаци" конкурссем ирттермеллине пĕлтерчĕ. Районшăн пысăк пĕлтерĕшлĕ мероприятие дизайнерсемпе архитекторсене, тавралăха симĕслетес енĕпе ĕçлеме пултаракан агрономсене явăçтарма канаш пачĕ вăл. Çавăн пекех предприяти-организацисен ертÿçисене ĕçпе тивĕçтерекен центрпа килĕшÿ туса ĕçсĕррисене чечексем çитĕнтерес, вĕсене пăхса тăрас ĕçе хутшăнтарма сĕнчĕ. Çакна та асăнмалла: çут çанталăк ландшафчĕпе килĕшÿллĕн клумбăсем ăсталанă, газонсене çу каçипе тирпейлĕ тытнă предприяти-организацисене пысăк премисем кĕтеççĕ. Конкурс августăн 20-мĕшĕччен пырĕ.
Канашлăва пĕтĕмлетсе И.Л.Хораськин Чечексен çулталăкĕнче кашнине яваплăха туйса ĕçлеме, "чечексен тĕнчине" йĕркелеме чĕнсе каларĕ.